„Vægt til orða tekið mjög óánægður með þessa breytingu“

Handboltalið Vals kom til Benidorm á laugardaginn og freistar þess í kvöld að fylgja eftir sterkum sigri á Ferencváros í fyrsta leik sínum í Evrópudeildinni.

Valsmenn léku ekki í Olís-deildinni um helgina, þar sem leik þeirra við Gróttu var frestað til 19. desember en Gróttumenn drógust inn í fyrstu umferð bikarkeppninnar og léku í henni síðasta fimmtudag.

„Ég var vægt til orða tekið mjög óánægður með þessa breytingu. Þetta hentar okkur verr að mínu mati sem þjálfara. En það getur vel verið að þetta henti okkur ágætlega núna, enda voru menn mjög hátt uppi eftir fyrsta leik í keppninni,“ sagði Snorri í viðtali við Arnar Daða Arnarsson í Handkastinu.

„En fegurðin og áskorunin fyrir mig sem þjálfara eru þessir leikir á milli Evrópuleikja, og ég hefði viljað sjá okkur glíma við það. Auðvitað hefði þá verið tækifæri fyrir Gróttu í þessu tilviki að vinna okkur, á meðan að menn voru enn hátt uppi, en ég hefði bara viljað spila. Mér finnst þetta ekkert mikið betra upp á þennan leik hérna úti. Maður getur farið í of marga hringi bara sem þjálfari, ofhugsað hlutina, og allt í einu er maður farinn að búa til einhver kerfi sem við notum ekkert. Mín reynsla er að það sé betra að gera það vel sem þú ert vanur og góður í,“ sagði Snorri og er greinilega ekki sömu skoðunar og margir fótboltaþjálfarar sem vilja fá hlé á milli leikja í Evrópukeppnum.

Viðtal Arnars Daða við Snorra má heyra í nýjasta þætti Handkastsins hér að neðan.

Snorri segir erfitt að segja til um það við hvernig leik megi búast af hálfu Benidorm í kvöld:

„Ég býst bara við þessu öllu. Það er mjög erfitt að undirbúa sig. Það var það líka fyrir leikinn við Ungverja sem spila mikið 7 gegn 6 heima í Ungverjalandi. En þetta er allt öðruvísi mótherji, sem er eðlilegt í Evrópukeppni. Mér finnst erfitt að rýna í leiki úr öðrum deildum, kannski er það eitthvað reynsluleysi, en það er alla vega vont að slá einhverju föstu út frá því. Það er rosalega margt sem við þurfum að varast og vera tilbúnir í,“ sagði Snorri.

„Óttast það að hlaupa einhvern tímann á vegg“

„Mér finnst þeir mjög góðir „maður á mann“. Þeir eru mjög snöggir, „litlir“ og ná ágætis floti með boltann. Ég er stundum hissa á því hvað þeir nota mikið „7 á 6“ í sókn því mér finnst þeir ekki þurfa á því að halda, en það er bara mín skoðun. Að sama skapi spila þeir 7 á 6 ágætlega. En ég myndi frekar óttast að þeir spili á okkur 6 á 6, verði mjög beinskeyttir og fari á okkur maður á mann,“ bætti hann við.

Valsmenn eru nú í fyrsta sinn með í Evrópudeildinni, sem er næststerkasta keppni Evrópu, og vita að við ramman reip verður að draga.

„Ég er ekki sigurviss [fyrir kvöldið] en ég er alveg bjartsýnn,“ sagði Snorri og bætti við: „Ég hef trú á að við getum náð í úrslit hérna. Það er sama tilfinning að koma og fyrir leikinn við Ungverjana. Það er smá óvissa, og maður óttast það að hlaupa einhvern tímann á vegg og hugsanlega gerum við það í þessari keppni. Ég á aðeins erfitt með að meta styrkleika þeirra [leikmanna Benidorm] og hvar við stöndum gagnvart þeim. Ég er því ekki sigurviss en bjartsýnn á að með okkar besta leik getum við náð úrslitum.“

Allir leikir Vals í Evrópudeildinni eru sýndir í beinni útsendingu á Stöð 2 Sport. Útsending hefst klukkan 19:30 í kvöld.