Hugvíkkandi efni spennandi en margt enn óljóst

Árni Sæberg skrifar 9. janúar 2023 20:34

Karl Reynir Einarsson er formaður Geðlæknafélags Íslands. Bylgjan

Geðlæknar eru upp til hópa spenntir fyrir þeirri nálgun að hugvíkkandi efni í lækningarskyni að sögn Karls Reynis Einarssonar, formanns Geðlæknafélags Íslands.

Hann segir þó margt óljóst, til að mynda um hver ætti að framkvæma meðferðina en geðlæknar séu nú þegar önnum kafnir og ekki hlaupið að því að bjóða upp á meðferðir fyrir marga.

„Það er mjög mikilvægt að fólk fari ekki fram úr sér og draga ekki of miklar ályktanir af þessum rannsóknum en ég vil samt segja að mér finnst svona meiri líkur en minni á því að það muni koma eitthvað jákvætt út úr þessu og þetta muni komast í einhvers konar notkun hjá fólki með geðraskanir, við vitum bara ekki alveg í dag fyrir hverja og við vitum ekki alveg hver áhættan er til lengri tíma og þess háttar,“ sagði Karl Reynir í Reykjavík Síðdegis á Bylgjunni í dag.

Mikilvægt að draga ekki of víðtækar ályktanir

Hann segir fjölmargar rannsóknir vera í gangi um allan heim núna og niðurstaða þeirra sé að vænta á allra næstu árum, til dæmis hvað varðar meðhöndlun þunglyndis með sílósíbíni.

„Þessar rannsóknir lofa góðu en maður verður samt að hafa í huga að draga ekki of miklar ályktanir af þeim. Vegna þess að þessar rannsóknir eru þannig gerðar að þetta er alveg sérvalinn hópur fólks sem er tekinn inn í rannsóknirnar. Þannig að það er ekkert hver sem er, til dæmis með þunglyndi, sem samþykkir að taka þátt í rannsókn á svona hugvíkkandi efnum. Þannig að strax þar er búið að velja ákveðinn hóp sem er svolítið jákvæður gagnvart þessu,“ segir Karl Reynir.

Þá séu margir útilokaðir úr rannsóknunum sem glíma við aðra geðræna kvilla á borð við geðhvörf.

Viðtal við Karl Reyni í Reykjavík síðdegis má heyra í spilaranum hér að neðan:

Geðheilbrigði Heilbrigðismál Reykjavík síðdegis Hugvíkkandi efni

Tengdar fréttir

Löggan mætir á ráðstefnu um hugvíkkandi efni

Söru Maríu Júlíudóttur, skipuleggjanda mikillar ráðstefnu um hugvíkkandi efni – Psycedelics in Medicine – sem fram fer í Hörpu 12. til 13. þessa mánaðar, verður að ósk sinni en fulltrúar lögreglunnar hafa boðað komu sína.

5. janúar 2023 15:43

Sprengdi sig frá höfuðkvölum, þunglyndi og lyfjafíkn með hjálp hugvíkkandi efna

Þórarinn Ævarsson, landsþekktur athafnamaður, segir annus horriblis nú að baki. Þórarinn fór í dýpstu dali, svartnættið eitt blasti við og hann sá aðeins eina leið út. Nefnilega þá að ljúka þessu sjálfur. Þórarinn var orðinn háður ópíóðalyfjum, þjáðist af heiftarlegum höfuðverkjaköstum og þunglyndi en með hjálp hugvíkkandi efna segist Þórarinn hafa öðlast nýtt líf.

5. janúar 2023 07:01

Ísland engan veginn í stakk búið fyrir viðamiklar lyfjarannsóknir

Ísland er langt í frá reiðubúið til að taka þátt í umfangsmiklum lyfjarannsóknum, ef marka má umsagnir um þingsályktunartillögu um heimild til rannsókna og notkunar á efninu sílósíbíni (e. psilocybin) í geðlækningum.

1. desember 2022 08:11

Hugvíkkandi efni hjálpuðu við að takast á við dauðann

Ólafur Hrafn Ásgeirsson, sextugur kerfisstjóri og fyrrum hnefaleikakappi, greindist með fjórða stigs krabbamein fyrir örfáum árum og eftir að krabbameinið hafi dreifst víða um líkamann ákvað hann að prófa hugvíkkandi efni.

30. nóvember 2022 10:30

„Þurfum að fylgja vísindunum í notkun hugvíkkandi efna“

Formaður læknaráðs Landspítalans er ánægður yfir auknum áhuga á geðheilbrigðismálum sem lýsi sér m.a. í nýrri þingsályktunartillögu um sílósíbín sem finnst í ofskynjunarsveppum. Það sé hins vegar mikilvægt að bíða eftir frekari rannsóknum um efnið. Íslendingar hafi þegar fengið tilboð um að taka þátt í síðasta fasa stórrar rannsóknar á gagnsemi efnisins.

10. nóvember 2022 21:01