Dæmdir fyrir sér­stak­lega hættu­lega líkams­á­rás

Árásin átti sér stað í bílskúr á Selfossi 8. nóvember árið 2020. Þá voru árásarmennirnir og fórnarlambið í samkvæmi í bílskúr. Fórnarlambið var þá laminn í hausinn með flösku, tekinn hálstaki og dreginn inn í herbergi inn af skúrnum. Þar var hann laminn í höfuðið með hamri og missti við það meðvitund. 

Vitni sögðu fyrir dómi að fórnarlambið hafi stuttu fyrir árásina verið að rífast við annan árásarmannanna í síma. Skömmu eftir að símtalinu lauk hafi tveir grímuklæddir menn ruðst inn og ráðist á fórnarlambið. 

Í skýrslutöku kvaðst annar árásarmannanna ekki muna vel eftir atvikum en mundi þó að til átaka hefði komið milli hans og brotaþola. Hinn árásarmaðurinn játaði að hafa ráðist á manninn en mundi ekki eftir því að hafa beitt hamri við árásina. 

Mennirnir breyttu afstöðu sinni við upphaf aðalmeðferðar í október á síðasta ári. Þá viðurkenndi annar árásarmannanna að hafa veist að fórnarlambinu, slegið hann í nokkur skipti í höfuð og líkama með krepptum hnefa og einu sinni slegið hann með glerflösku. Hann neitaði hins vegar að hafa sparkað í fórnarlambið og að hafa slegið hann með hamri. 

Hinn árásarmaðurinn játaði að hafa tekið fórnarlambið hálstaki sem og hafa slegið hann í líkama og höfuð með krepptum hnefa. Hann neitaði hins vegar að hafa slegið fórnarlambið með glerflösku eða hamri eða hafa sparkað í líkama fórnarlambsins. Báðir mennirnir samþykktu bótakröfur fórnarlambsins. 

Annar mannanna hafði tvisvar verið dæmdur í skilorðsbundið fangelsi fyrir líkamsárás og minniháttar líkamsárás. Var honum því dæmdur hegningarauki. Hann var dæmdur í fjögurra mánaða fangelsi, skilorðsbundið til tveggja ára. Hinn árásarmaðurinn var dæmdur í þrjátíu daga fangelsi, skilorðsbundið til tveggja ára. Sameiginlega greiða þeir fórnarlambinu 450 þúsund krónur í miskabætur.