Um­deildur dómur fyrir árás við Club 203 þyngdur veru­lega

Árásin átti sér stað fyrir utan skemmtistaðinn 203 Club við Ingólfstorg í Reykjavík í mars í fyrra. Bæði lungu fórnarlambsins féllu saman við árásina en fórnarlambið fékk fleiri áverka. Daniel stakk hann að minnsta kosti sex sinnum með skrúfjárni. 

Meðal sönnunargagna í málinu var myndband frá vettvangi sem birt var í fjölmiðlum, meðal annars á Vísi, í kjölfar árásarinnar.

Samverkamaður Daniels, 25 ára karlmaður sem lét höggin dynja á fórnarlambinu, hlaut þriggja mánaða skilorðsbundinn dóm fyrir aðkomu sína að málinu.

Daniel var ákærður fyrir tilraun til manndráps. Héraðsdómur Reykjavíkur sýknaði hann hins vegar af tilraun til manndráps þar sem ekki væri hægt að slá því föstu að Daniel hlyti að hafa verið ljóst að bani kynni að hljótast af atlögunni. Var hann sakfelldur fyrir stórfellda líkamsárás. 

Þessu var Landsréttur ósammála og dæmdi Daniel til fimm og hálfs árs fangelsisvistar fyrir tilraun til manndráps. Dómur varð kveðinn upp klukkan 14 í dag og má sjá í viðhengi neðst í fréttinni.

Landsréttur segir í niðurstöðu sinni að Daniel hafi á verknaðarstundu ekki getað dulist að langlíklegast væri að bani hlytist af atlögunni; endurteknum stungum með skrúfjárni í ofanvert bak sem gekk inn í brjóstvegg og lífshættulegir áverkar hlutust af. Var hann því sakfelldur fyrir tilraun til manndráps.

Miskunnarlausir í andlitinu

Dómurinn í héraði vakti mikla athygli í fyrra og steig móðir fórnarlambsins fram í fjölmiðlum. Hún sagði augljóslega um manndrápstilraun að ræða og skoraði á saksóknara að áfrýja dómnum til Landsréttar, sem var gert.

„Við sjáum andlitin á þeim. Og þeir eru miskunnarlausir í andlitinu. Þeir eru ekkert að fara að stoppa. Það er bara rosalegt að horfa á þetta. Það er mjög erfitt. Og maður horfir á þetta með trega,“ sagði Bjarnheiður Alda Lárusdóttir.

„Það var bara lukka að hann skyldi komast inn í sjúkrabíl. Og það var lukka líka að gangandi vegfarandi skyldi ná að stoppa og taka þá af honum.“

Bjarnheiður Alda taldi allt eins líklegt að árásin hefði annars gengið lengra. Og áverkar sonar hennar hefðu verið lífshættulegir; hann var stunginn minnst sex sinnum í bakið með skrúfjárni, lungu hans féllu saman og hann var í hættu á að fá hjartaáfall. Þá benti hún á að dómari hefði talið framburð árásarmanna ótrúverðugan.

„En á sama tíma þá hlustar hann á annan þeirra segja að hann [árásarmaður] hafi ekki gert sér grein fyrir því að hann væri kannski að fara að drepa hann [son hennar]. Myrða hann. En það þarf mikið afl til að stinga í gegnum svona fóðraðan gallajakka eins og hann var í. Í gegnum skinnið á honum, sex sinnum eða oftar. Þetta heldur ekki vatni,“ sagði Bjarnheiður Alda.

Viðhorfi ástvina megi ekki ráða

Sitt sýndist þó hverjum um niðurstöðuna í héraði. Jón Steinar Gunnlaugsson, hæstaréttarlögmaður og fyrrverandi hæstaréttardómari, ræddi niðurstöðuna í Reykjavík síðdegis á Bylgjunni. Þar sagðist hann hafa í fyrstu talið að refsingin ætti að vera þyngri. Eftir að hafa rýnt dóminn úr héraði sagðist hann skilja afstöðu dómarans.

„Við verðum að gæta varúðar áður en við tökum bara upp viðhorf þeirra sem eru ástvinir þeirra sem verða fyrir hættulegum líkamsárásum og skrifum upp á það vegna þess að dómarinn getur ekkert gert það. Hann verður að leysa úr þessu með, eigum við að segja órómantískri hlutlægni lögfræðingsins sem á að dæma þetta. Hann getur ekkert sveiflast til í viðhorfum í því hann verður bara að meta þetta kalt og hart,“ sagði Jón Steinar.

Þrír dómarar í Landsrétti komust að annarri niðurstöðu en einn dómari í héraði og dæmdi Daniel sem fyrr segir í fimm og hálfs árs fangelsi fyrir tilraun til manndráps.

• Club_203_DómurPDF270KB
  Sækja skjal