Útiliðið hefur ekki unnið Hafnarfjarðarslaginn í fimm ár og fimm mánuði

Óskar Ófeigur Jónsson skrifar 27. febrúar 2023 15:31

Einar Bragi Aðalsteinsson fær hér harðar móttökur frá Adami Hauki Baumruk í fyrri leik liðanna. Vísir/Hulda Margrét

Haukar fá nágranna sína í FH í heimsókn á Ásvelli í kvöld í seinni deildarleik liðanna í Olís deild karla í handbolta á þessu tímabili.

Baráttan um Hafnarfjörð verður að sjálfsögðu í beinni á Stöð 2 Sport en upphitun hefst klukkan 19.15 og leikurinn svo klukkan 19.30.

FH vann eins marks sigur í fyrri leiknum, 27-26, sem þýðir að útiliðið hefur ekki unnið Hafnarfjarðarslaginn síðan 25. september 2017 eða í fimm ár og fimm mánuði.

Heimaliðið hefur enn fremur unnið fjóra síðustu leiki en frá því að FH vann á Ásvöllum í september hefur útiliðið aðeins náð í samtals fjögur stig í tíu leikjum (4 jafntefli og 6 töp). Það gera aðeins 0,4 stig í leik.

Síðasti sigur FH á Ásvöllum var einnig síðasti útisigurinn í Hafnarfjarðarslagnum en FH vann 27-23 sigur í þeim leik.

Flestir leikjanna hafa þó oftast verið jafnir og spennandi þótt að heimaliðið hafi aldrei tapað á þessum tíma.

Sigursteinn Arndal, þjálfari FH, er í kvöld að stýra FH í áttunda sinn í Hafnarfjarðarslag í deildinni en FH-ingar eiga enn eftir að vinna á Ásvöllum undir hans stjórn (1 jafntefli og 2 töp). FH-liðið hefur hins vegar unnið þrjá af fjórum heimaleikjum sínum á móti Haukum undir hans stjórn.

Ásgeir Örn Hallgrímsson, þjálfari Hauka, hefur margoft tekið þátt í Hafnarfjarðarslagnum sem leikmaður en mætir nú í fyrsta sinn sem þjálfari.