Sendi­herra Rússa í Banda­ríkjunum kallar upp­á­komuna „ögrun“

Antonov sagði Rússa ekki sækjast eftir átökum við Bandaríkin heldur vilja eiga í praktískum samskiptum.

Ummælin lét sendiherrann falla eftir að hann var kallaður á teppið af Bandaríkjamönnum.

Samkvæmt ráðamönnum vestanhafs var dróninn á hefðubundnu eftirlitsflugi yfir alþjóðlegu hafsvæði vestur af Krímskaga þegar tvær Su-27 höfðu af honum afskipti. Önnur var sögð hafa losað eldsneyti á hann og hin stuggað við honum.

Dróninn, af tegundinni MQ-9 Reaper, neyddist til að brotlenda í kjölfarið.

Rússneska varnarmálaráðuneytið hefur neitað því að þoturnar hafi notað vopn gegn drónanum, né hafi þær snert hann. Ráðuneytið segir þoturnar hafa verið sendar til að kanna um hvað var að ræða, þar sem dróninn hafi stefnt að landamærum Rússlands.

Hermálayfirvöld í Bandaríkjunum segja Rússa ekki hafa drónann en hafa ekki viljað svara því hvort þeir telji Rússa leita að brakinu til að geta rannsakað það.

Bandaríkjamenn hafa sakað Rússa um að sýna af sér glannalega og ófaglega hegðun. Þá hefur Ben Wallace, varnarmálaráðherra Bretlands, hvatt Rússa til að virða alþjóðlega lofthelgi.

„Ég tel að þetta sé, aftur, dæmi um að Rússar spila ekki samkvæmt relgum, sem er það sem er undir í Úkraínu,“ sagði Richard Marles, varnarmálaráðherra Ástralíu, í morgun.