Kalla settan ríkis­endur­­skoðanda á fund um Lindar­hvol: „Mögu­lega til­gangs­lausasti fundur þing­sögunnar“

Lindarhvolsmálið var enn og aftur til umræðu á Alþingi í dag en þó nokkrir tóku til máls undir liðnum fundarstjórn forseta á sjötta tímanum i dag. Þar kom meðal annars fram að fyrrverandi settur ríkisendurskoðandi hafi verið boðaður á fund nefndar eftir helgi. 

Þórhildur Sunna Ævarsdóttir, þingmaður Pírata, tók fyrst til máls og greindi frá ákvörðun meirihluta stjórnskipunar- og eftirlitsnefndar um að boða settan ríkisendurskoðanda á fund. Það hafi vakið furðu þar sem forseti Alþingis hefur neitað að birta greinagerð um Lindarhvolsmálið. 

„Og nú getum við spurt: Hvað ætlum við að ræða við settan ríkisendurskoðanda? Á að kalla manninn til fundar við stjórnskipunar- og eftirlitsnefnd til að ræða greinargerð sem hann má ekki ræða? Til að vitna í skjal sem hann má ekki vitna í? Hér er um mikla sýndarmennsku að ræða af hálfu meirihlutans sem ætlar að skreyta sig einhverjum gagnsæisfjöðrum til að halda mögulega tilgangslausasta fund þingsögunnar,“ sagði Þórhildur Sunna og hlátrarsköll heyrðust úr sal.

Setti hnefann í borðið

Fjölmargir þingmenn stjórnarandstöðunnar tóku til máls, þar á meðal Sigmar Guðmundsson, þingmaður Viðreisnar, Jóhann Páll Jóhannsson, þingmaður Samfylkingarinnar, og Inga Sæland, þingmaður Flokks fólksins. 

Inga Sæland velti því upp hvernig það stæði á því að verið væri að gera lítið úr ríkisendurskoðanda með því að kalla greinargerðina „vinnuplögg“ og „drög“.

„Við erum kjörnir fulltrúar. Hvers lags fíflagangur er þetta með fullri virðingu, háttvirtir þingmenn og virðulegur forseti, ég botna hvorki upp né niður í þessu. Og það er skilyrðislaust, skilyrðistlaust, að það á að birta þessa skýrslu!“ Heyra mátti hvatningarorðin „heyr heyr“ undir ræðu Ingu Sæland, sem bókstaflega setti hnefann í borðið til að leggja áherslu á mál sitt í pontunni.

Vísuðu ummælum um farsa til heimahúsanna

Halla Signý Kristjánsdóttir, þingmaður Framsóknarflokksins og nefndarmaður í stjórnskipunar- og eftirlitsnefnd, svaraði að hluta fyrir fundarboðið. 

„Við erum að fara að fjalla um skýrsluna og þeim er frjálst hvað þeir koma með. Við setjum fram spurningar og þeir verða að svara eftir því. Ég mótmæli því algjörlega að við séum að setja upp einhvern farsa af því að þetta er bara framhald af þeirri vinnu sem var sett af stað á síðasta kjörtímabili og ekkert óeðlilegt við það,“ sagði hún. 

Steinunn Þóra Árnadóttir, þingmaður Vinstri grænna, velti því þá fyrir sér hvort að sumir þingmenn hefðu ekki áttað sig á hvað yrði sett á dagskrá og Hildur Sverrisdóttir, þingmaður Sjálfstæðisflokksins, sagði það frekar farsa af hálfu stjórnarandstöðunnar að kalla vikum saman eftir skjali sem samkvæmt lögum megi ekki birta. 

„Mjög alvarlegar og endregnar athugasemdir“

Birgir Ármannsson, forseti Alþingis, ákvað þá að grípa inn í.

„Forseti vill geta þess, að ástæða þess að talið hefur verið töluvert viðurhlutamikið af hálfu þingsins að birta þessa greinargerð setts ríkisendurskoðanda, eru mjög alvarlegar og eindregnar athugasemdir sem komið hafa frá ríkisendurskoðanda sem tók við verkefninu sumarið 2018, lauk því 2020.“

„Bæði núverandi ríkisendurskoðandi og forveri hans hafa gert mjög miklar athugasemdir við það þegar áform voru uppi af hálfu forsætisnefndar þingsins að birta þetta skjal,“ sagði hann. 

Hann segir að ríkisendurskoðandi hafi vísað til laga um ríkisendurskoðun varðandi afhendingu gagna. Eins hafi ríkisendurskoðandi lýst því yfir að hann teldi birtingu á greinargerðinni fela í sér inngrip á starfsemi stofnunarinnar.