Nýjar stefnur kynntar og ný stjórn kjörin í dag

Katrín Jakobsdóttir, forsætisráðherra og formaður flokksins, flutti ávarp þegar fundurinn hófst í gærkvöldi. Hún stappaði stálinu í félagsmenn en fundurinn fer fram í skugga úrsagna á fjórða tug félagsmanna vegna óánægju með afgreiðslu útlendingafrumvarps dómsmálaráðherra í vikunni. Kallað var úr sal í miðri ræðu Katrínar, þar sem hún var sökuð um lygar, en sá reyndist ekki vera meðlimur hreyfingarinnar.

Jana Salóme Ingibjargar Jósepsdóttir, bæjarfulltrúi VG á Akureyri, er fundarstjóri og sækist einnig eftir embætti ritara hreyfingarinnar en hún segir stemninguna þrátt fyrir allt góða.

„Ég met það svo að hér séu allir komnir til þess að vinna úr stefnumálum og að betri framtíð,“ segir Jana en aðspurð um hvort úrsagnirnar hafa áhrif segir hún:

„Við sjáum auðvitað á eftir góðum félögum en hver verður að fylgja sinni sannfæringu og við virðum það, en í VG hefur alltaf verið talað opinskátt og allar raddir fá að heyrast og það hefur ekkert breyst núna.“

Vikið var að útlendingafrumvarpinu, ásamt öðrum málum, í almennum stjórnmálaumræðum í gærkvöldi þar sem fólk hafði ýmislegt að segja. Áfram sé fólk í flokknum sem sé að einhverju leyti ósátt. „Það er held ég bara eðlilegt, við erum partur af fjölbreyttri hreyfingu og við erum ekki alltaf öll sammála um allt,“ segir Jana.

Orkustefna tekin upp í fyrsta sinn

Stefnur flokksins voru kynntar nú í hádeginu og verða afgreiddar síðar í dag en þar er eitthvað um nýjar stefnur.

„Við erum að taka upp orkustefnu í fyrsta skipti sem er mjög spennandi af því að við viljum afla orku á sjálfbæran hátt. Síðan erum við einnig með stefnu um málefni fatlaðs fólks sem kemur auðvitað beint inn á lögfestingu sáttmála Sameinuðu þjóðanna um réttindi fatlaðs fólks og inngildingu í samfélagið,“ segir Jana.

„Ég held að það séu svona þær tvær stefnur sem eru nýbreytni hjá okkur og tala sterkt inn í málefni núverandi stundar,“ segir hún enn fremur.

Áfram sé byggt að fjórum grunnstoðum flokksins, um umhverfisvernd, félagslegt réttlæti, alþjóðlegt friðarríki og kvenfrelsi.

„Það hefur ekkert breyst. Þingmenn og sveitarstjórnarfulltrúar, allir kjörnir fulltrúar, vinna daglega að þeim stefnumálum sem við mörkum okkur á landsfundi, sem er auðvitað æðsta vald hreyfingarinnar,“ segir Jana.

Nýr ritari og nýr gjaldkeri taka sæti í stjórn

Landsfundurinn hófst líkt og áður segir í gær en honum lýkur á morgun. Meðal dagskráliða í dag eru ávörp frá fundargestum og pallborð um erindi félagshyggju á ófriðartímum, sem hófst klukkan 13:30 og er streymt í beinni. 

Um klukkan þrjú fer fram kosning til stjórnar en Katrín Jakobsdóttir og Guðmundur Ingi Guðbrandsson eru ein í framboði til formanns og varaformanns þar sem ekkert mótframboð barst.

Nýr ritari verður þó kjörinn, þar sem núverandi ritari flokksins, Sóley Björk Stefánsdóttir, sækist ekki eftir endurkjöri. Þá verður nýr gjaldkeri kjörinn í stað Rúnars Gíslasonar sem sækist heldur ekki eftir endurkjöri.

Jana Salóme er önnur þeirra sem sækist eftir stöðu ritara en Sigríður Gísladóttir, dýralæknir og formaður Vinstri grænna á Vestfjörðum, sækist einnig eftir embættinu. Tvö framboð bárust einnig í embætti gjaldkera, það eru Líf Magneudóttir, borgarfulltrúi VG, og Steinar Harðarson, vinnuverndarráðgjafi og athafnastjóri.

Þrettán gefa kost á sér í stöðu meðstjórnanda, þau Andrés Skúlason, Álfheiður Ingadóttir, Einar Bergmundur, Elín Björk Jónasdóttir, Guðný Hildur Magnúsdóttir, Helgi Hlynur Ásgrímsson, Hólmfríður Árnadóttir, Klara Mist Pálsdóttir, Maarit Kaipainen, Maria Maack, Ólafur Kjartansson, Óli Halldórsson og Pétur Heimisson

Á morgun verður þá kosnir fjörutíu fulltrúar og tíu varamenn í flokksráð en framboðsfrestur rennur út síðdegis.