Herðist á rembi­hnútnum sem Lindar­hvols­málið er í

Fundurinn var lokaður en samkvæmt heimildum Vísis ítrekaði Guðmundur Björgvin þar þá eindregnu skoðun sína að ekki bæri undir neinum kringumstæðum að birta greinargerð Sigurðar Þórðarsonar um Lindarhvol. Ótvírætt er að hans mati að greinargerð Sigurðar sé vinnugagn og eigi því ekkert erindi við almenning.

Guðmundur Björgvin lét þessa skoðun í ljós í viðtali við Vísi og hefur staðfastlega haldið sig við hana.

Afar deildar meiningar eru um hvort birta beri greinargerð Sigurðar en hann sendi forseta þingsins greinargerð sína, afrakstur tveggja ára rannsóknar sinnar. Þegar Skúli Eggert Þórðarson var skipaður ríkisendurskoðandi lét hann verða sitt fyrsta verk að draga verkefnið úr höndum Sigurðar, sem hefur sagt að skýrslan hafi þá verið á lokametrunum. Sigurður sendi greinargerð sína til forseta Alþingis. Meðal þeirra sem telja að það þýði einfaldlega að greinargerðin sé þar með til þingheims alls er Þorsteinn Pálsson fyrrverandi forsætisráðherra en Birgir Ármannsson forseti Alþingis telur ýmsa meinbugi á því að greinargerðin sé lögð fram.

Sem svart og hvítt skýrsla Skúla Eggerts og greinargerð Sigurðar

Sjálfur hefur Sigurður sagt, í viðtali við Vísi, að hann hafi alltaf litið svo á að greinargerð sín sé opinbert plagg. En hann vill ekki leggja hana fram sjálfur, það hljóti að sína leið. Sigurður hefur þó reynt að opna málið meðal annars með því að senda bréf til stjórnskipunar- og eftirlitsnefndar. Hann er ósáttur við að sitja undir ávirðingum þess efnis að greinargerð hans sé meingölluð, en Skúli Eggert Þórðarson hefur látið þau orð falla. 

Skúli Eggert skilaði skýrslu um Lindarhvolsmálið tveimur árum eftir að athugunin var tekið úr höndum Sigurðar og hefur Sigurður sagt að hann hreinilega kannist ekki við hvað þar sé til umfjöllunar, skýrsla Skúla Eggerts og greinargerð Sigurðar er eins og svart og hvítt. En í skýrslu Skúla Eggerts virðist starfsemi Lindarhvols hafa verið til fyrirmyndar.

Þannig virðist ekkert virðist benda til þess að lausn sé í sjónmáli á Lindarhvolsmálinu en þingmenn stjórnarandstöðunnar hafa sótt oft og hart að Birgi og krafist þess að greinargerð Sigurðar verði lögð fram. Fyrir liggi lögfræðiálit sem segja að hún skuli birt en Birgir hefur viljað líta til umsagnar úrskurðarnefndar um upplýsingamál þar sem segir að þagnarskylduákvæði yfirtrompi rétt almennings til upplýsinga.

Umboðsmaður telur stjórnvöld skorta skilning á reglum 

Skúli Magnússon umboðsmaður Alþingis hefur krafið fjármálaráðuneytið skýringa á þessari túlkun sem hann telur vafasama hvað varðar leynd yfir vinnuskjölum og rétt almennings til upplýsinga. Skoðun hans á því máli er lokið en hann bendir á í því samhengi ...

„að almennt kunni stjórnvöld að skorta fullnægjandi skilning á þeim reglum sem gilda um rétt almennings til aðgangs að vinnuskjölum svo og heimildum stjórnvalda til að birta þau umfram skyldu. Verður því tekið til skoðunar hvort ástæða sé til að fjalla um þetta atriði með almennum hætti.“

Boðaður opinn fundur í stjórnskipunar- og eftirlitsnefnd þar sem Sigurður Þórðarson skipaður endurskoðandi átti að vera gestur nefndarinnar er í uppnámi. Sigurður sagði takk, en nei takk – hann hafði engan áhuga á því að ræða efni skýrslu sinnar múlbundinn. Nefndinni er þannig nokkur vandi á höndum.