Bíður eftir tillögum frá samráðshópi um sjúkraflug á Suðurlandi

Eins og fréttastofa hefur fjallað um að undanförnu hafa skapast miklar áhyggjur hjá ferðaþjónustu og viðbragðsaðilum vegna aukins álags út af fjölgun ferðamanna. Von er á 2,3 milljónum erlendra ferðamanna til landsins á þessu ári ef spár ganga eftir en lítil viðbragðsgeta er víða, eins og aðalvarðstjóri sjúkraflutninga hjá Heilbrigðisstofnun Suðurlands lýsti í viðtali um helgina.

Willum Þór Þórsson heilbrigðisráðherra segist hafa fullan skilning á þessum áhyggjum og augljóst að eftir því sem ferðamönnum fjölgar eykst álagið á ýmis konar þjónustu.

„Meðal annars viðbragðsþjónustuna og bráðaþjónustuna á landinu. Við erum með samráðshóp lykilaðila í sjúkraflugi og ég á von á tillögum bara mjög fljótlega um það efni. Það tengist auðvitað þjónustunni vítt og breitt um landið, sjúkrafluginu og þeim samningum sem við höfum um það. Sömuleiðis aðkomu Gæslunnar og tilraunverkefni um þyrlu hér á suðursvæðinu,“ sagði Willum að loknum ríkisstjórnarfundi í morgun.

Bíður átekta

Vilhjálmur Árnason, þingmaður Sjálfstæðisflokksins, sagði í viðtali við Vísi í morgun að hann muni þrýsta á Willum að dusta rykið af umræðu um sjúkraþyrlu á Suðurlandi. Vilhjálmur hafði frumkvæði að því verkefni á sínum tíma og segir verkefnið eekki eiga að stóla á Landhelgisgæsluna, sem hafi öðrum hnöppum að hneppa. 

„Fyrir Covid vorum búin að fá samþykki fyrir sjúkraþyrlunni. Ríkisstjórnin var búin að samþykkja minnisblað frá heilbrigðisráðherra um að hann og fjármálaráðherra var falið að koma verkefninu inn í fjármálaáætlun. Svo kom Covid og þá var svolítið erfitt að keyra prufuverkefni af því það vantaði ferðamennina,“ sagði Vilhjálmur.

Willum segir að þó talað hafi verið um að dusta rykið af umræðunni hafi umræðan verið í gangi.

„Og búið að vera á starfstíma þessa samráðshóps. Ég á von á tillögum mjög fljótlega um það mál og lykilatriðið er að styrkja viðbragðsþjónustu um allt land.“

Fagnar hvað ferðaþjónustan var fljót að ná sér

Vilhjálmur viðraði jafnframt áhyggjur, eins og leiðsögumenn, að innviðir landsins þoli einfaldlega ekki þennan mikla fjölda ferðamanna eins og ástand innviða er í dag: Hvorki sjúkraflutningar og heilbrigðisþjónusta, vegakerfi né löggæsla.

„Við getum auðvitað gert betur en við sjáum glögga innviðauppbyggingu alls staðar á landinu. Við sjáum að við þurfum að gera betur einhvers staðar og förum í það eins og við höfum ávallt gert. Nú erum við að móta ferðamálastefnu til 2030 og munum í næstu viku kynna um þá starfshópa sem munu taka þetta verkefni og þetta spennandi verkefni að sér,“ segir Lilja Alfreðsdóttir, ferðamálaráðherra, í samtali við fréttastofu.

Hún segist mega til að hrósa ferðaþjónustunni fyrir hve öflug hún hafi verið að koma til baka eftir Covid.

„Og þeim efnahagslega ávinningi sem ferðaþjónustan er að skila inn í þjóðarbúið og út um allt land,“ segir Lilja. 

Ferðaþjónustan leggi áherslu á að vöxtur verði sjálfbær

Bæði hún og heilbirgðisráðherra hafi unið að því að byggja upp bráðaviðbragð og Willum hafi verið ötull í að benda á álagið sem hafi ríkt á Heilbrigðisstofnun Suðurlands. 

„Við höfum auðvitað fullan skilning á því og höfum verið að auka fjárveitingar inn í þennan málaflokk einmitt til að takast á við þessa áskorun,“ segir Lilja.

„Annað sem við höfum verið að gera varðandi skattlagningu: Ég var að kynna núna í ríkisfjármálaáætlun að við erum að fara að skattleggja til að mynda skemmtiferaðskipin til að koma til móts við það að geta farið í frekari uppbyggingu. Öll ferðaþjónustan leggur áherslu á það að vöxtur hennar verði sjálfbær og það er leiðarljósið í því sem við erum að gera.“