Danir geta hlaupið í skarðið fyrir Land­helgis­­gæsluna á fundar­tíma

Þetta stað­festir Ás­geir Er­lends­son, upp­lýsinga­full­trúi Land­helgis­gæslunnar í sam­tali við Vísi. Þyrlur gæslunnar hafa vakið at­hygli borgar­búa í dag þar sem þær sveima yfir hverfum borgarinnar. Ás­geir segir þær þar við eftir­lits­störf fyrir lög­reglu vegna leið­toga­fundarins í Hörpu.

Eins og fram hefur komið er gríðar­leg öryggis­gæsla yfir­valda vegna fundarins í Hörpu sem fjöl­mörg al­þjóð­leg lög­reglu­em­bætti koma að á­samt því ís­lenska. Þyrlur Land­helgis­gæslunnar hafa verið nýttar til eftir­lits í Reykja­vík auk varðskipsins Þór.

Lögregluyfirvöld hafa ekki gefið upp hve margir lögreglumenn eru við öryggisgæslu við tónlistarhúsið en Karl Steinar Valsson, yfir­lög­reglu­þjónn al­þjóða­sviðs ríkis­lög­reglu­stjóra, sagði í kvöldfréttum Stöðvar 2 í kvöld að um hundrað sérfræðingar frá norðurlöndum væru hér við gæslu. 

Ás­geir segir að færi það þannig að þyrlurnar væru vant við látnar við eftir­lits­störf í sam­starfi við lög­reglu þegar út­kall berst til gæslunnar verði danska þyrlan til taks.

„Ef þannig staða kæmi upp þá getum við leitað til Dana sem gætu þá hlaupið í skarðið,“ segir Ás­geir. Staðan sé metin hverju sinni.

„Við höfum þá þessa þriðju þyrlu til taks sem er um borð í danska varð­skipinu og getum kallað það út til þess að sinna leit og björgun eða sjúkra­flutningum, hvort sem er á sjó eða landi.“