Aron Rafn varði 9 skot í röð og skoraði líka fleiri mörk en allt lið Aftureldingar

Í jafnri stöðu hreinlega lokaði Aron Rafn marki sínu og opnaði ekki aftur fyrr en í bulltíma í blálokin þegar úrslitin voru ráðin.

Þegar betur er að gáð kom í ljós að Aron hafði varið níu skot í röð frá Aftureldingu og alls níu af tíu skotum Mosfellinga á síðustu fimmtán mínútum leiksins.

Það var ekki nóg með það því Aron Rafn skoraði líka tvö mörk sjálfur yfir allan völlinn. Hann skoraði því líka fleiri mörk en Afturelding þessar fimmtán mínútur.

Aron varði þessi níu skot frá sex mismunandi leikmönnum Mosfellinga en það var sama hver reyndi það fann enginn þeirra leið fram hjá honum.

Síðasti markið sem Aron Rafn fékk á sig fyrir þennan kafla var vippumark frá Blæ Hinrikssyni úr vítakasti. Blær tókst að vippa yfir þennan tveggja marka markmann úr vítaskoti og það er eins og sú „ósvífni“ hafi hreinlega kveikt í Aroni.

Það voru nákvæmlega 44:00 á klukkunni þegar boltinn lak í markið eftir víti Blæs og því sextán mínútur eftir af leiknum og staðan 16-16.

Það var loksins Gestur Ólafur Ingvarsson sem náði að skora hjá Aroni þá var á klukkunni 58 mínútur og 58 sekúndur. Aron hélt því hreinu í nákvæmlega fjórtán mínútur og 58 sekúndur.