„Ekki eitt­hvað sem allir for­eldrar myndu leyfa“

Stórleikur Stjörnunnar og Breiðabliks á morgun stendur upp úr í sjöundu umferðinni og ljóst er að öllu verður til tjaldað á Kópavogsvelli.

Þrátt fyrir ungan aldur er Sædís komin með stóra rullu í liði Stjörnunnar en þessi 18 ára bakvörður er jafnframt fyrirliði U19-landsliðsins sem spilar í lokakeppni EM í sumar.

„Ekki sjálfgefið að fá að flytja að heiman í tíunda bekk“

Sædís er úr Ólafsvík og hóf þar meistaraflokksferil sinn en segir liðið hafa verið lagt niður sama ár, og þar með lá leiðin í Garðabæinn þó að grunnskólagöngunni væri ekki lokið:

„Sambandið við Stjörnuna var einhvern veginn komið áður en ég vissi af. Ég er mjög þakklát fyrir tækifærið þar og það er ekki sjálfgefið að fá að flytja að heiman í tíunda bekk. Það er ekki eitthvað sem allir foreldrar myndu leyfa, þannig að ég er mjög þakklát foreldrum mínum fyrir að hafa leyft mér að gera það,“ sagði Sædís í spjallinu við Helenu. Hún kom til Stjörnunnar vön öðrum aðstæðum í Ólafsvík:

„Þetta er allt annað. Við æfðum inni á parketi allt árið en núna er komið þarna gervigras og flottur völlur. Ég veit að 3. og 4. flokkur spila þar saman, til að ná í lið, og það er mjög sterkur árgangur þar. Ég held að það hafi hjálpað mér mikið að búa þarna. Ég æfði líka með strákunum, sem hefur skilað sér,“ segir Sædís.

Heldur sig í Mosfellsbænum

Hafrún er sömuleiðis uppalin annars staðar en hjá því liði sem hún spilar fyrir í dag en hún kom til Breiðabliks úr Aftureldingu, og býr enn í Mosfellsbæ:

„Það var bara kominn tímapunktur fyrir mig til að breyta til. Ég var búin að vera í yngri landsliðum og þurfti stærri áskorun,“ segir Hafrún sem kom til Breiðabliks fyrir tímabilið 2020.

Upphitunarþáttinn með þeim Sædísi og Hafrúnu má sjá hér að neðan.

Krakkarnir fengu að kíkja með í klefann

Búast má við góðri umgjörð fyrir leikinn á Kópavogsvelli á morgun, sem verður í veglegri útsendingu á Stöð 2 Sport. Leiknum var flýtt til klukkan 18 með barnafjölskyldur í huga, enda segja þær Sædís og Hafrún tenginguna við leikmenn í yngri flokkum góða. Leikmenn Breiðabliks buðu þannig krökkunum í félaginu að koma og fylgjast með æfingu:

„Krakkarnir mættu og fengu að vera uppi í stúku síðasta hálftímann, og komu svo niður á völl að spjalla við okkur. Svo fengu þau áritaðar myndir frá okkur, og að kíkja svo inn í klefa með okkur og sjá allt þar. Það er geggjað fyrir þau að fá að sjá hvernig þetta er allt hjá okkur,“ segir Hafrún.

„Við höfum verið að kíkja á æfingar hjá yngri flokkunum, sérstaklega í kringum leiki hjá okkur, og héldum líka fótboltanámskeið. Ég held að þetta muni alltaf skila sér,“ segir Sædís sem tekur undir að það sé nauðsynlegt fyrir Stjörnuna að vinna annað kvöld, varðandi möguleika liðsins í toppbaráttunni.

Virkilega spennt fyrir EM í sumar

Eins og fyrr segir er Sædís fyrirliði U19-landsliðsins og þó að fókusinn sé á Stjörnuna þessa dagana þá hlakkar hún óneitanlega til lokamóts EM sem fram fer seinni hlutann í júlí:

„Ég er virkilega spennt og þetta er risatækifæri okkur til að sjá hvar við stöndum miðað við þessi lið. Það er ekki á hverjum degi sem við fáum að spila við til dæmis Frakkland og Spán. Við erum með gott lið og þurfum bara að halda út í gegnum erfiðu kaflana sem koma í öllum leikjum. Ef við höldum hreinu þá náum við alltaf að henda inn einu marki.“

Allt of margar stelpur dottið út

Hafrún á að baki 31 leik fyrir Íslands hönd, þar af 5 A-landsleik og 2 leiki fyrir U23-landsliðið sem nýlega var stofnað.

„Það er gríðarlega nauðsynlegt. Ég hefði viljað fá enn fleiri verkefni á þessu ári,“ segir Hafrún um U23-landsliðið sem hún telur nauðsynlegt milliskref á milli U19- og A-landsliðanna:

„Þetta er svo reglulegt. U17, svo beint í U19, og regluleg verkefni alltaf til að horfa til. En svo kemur eitthvað bil þarna og mér finnst allt of margar stelpur detta út, jafnvel bara út úr fótbolta, eftir U19-landsliðið, því þær vantar eitthvað markmið til að hafa,“ segir Hafrún í þættinum sem sjá má hér að ofan.