600 fer­kíló­metrar undir vatni og jarð­sprengjur á víð og dreif

Héraðsstjórinn, Oleksandr Prokudin, segir á samfélagsmiðlum í morgun að meðal vatnshæðin á flóðasvæðinu sé nú rúmur fimm og hálfur metri. 

Hjálparstarf er enn í fullum gangi en hjálparsamtök vara við hættunni af jarðsprengjum. Miklu magni slíkra sprengja hafði verið komið fyrir meðfram árbökkunum fyrir neðan stífluna og þegar hún brast hefur flóðvatnið hrifið margar þeirra með sér sem geta svo sprungið hvenær sem er. 

Volodómír Selenskí Úkraínuforseti sakaði í gær hjálparstofnanir um slæleg viðbrögð í málinu og kallaði sérstaklega eftir því að fólkinu á austurbakkanum, sem er í höndum Rússa, yrði hjálpað. 

Úkraínuher hefur meðal annars notast við dróna til að senda fólki sem er fast inni í húsum sínum vatn og aðrar nauðsynjar.