Sátu um vísinda­mann eftir „á­skorun“ Rogan og Musk

Forsaga málsins er sú að Peter Hotez, barnalæknir sem sérhæfir sig í bóluefnum og hitabeltissjúkdómum, gagnrýndi Rogan um helgina fyrir að veita Robert Kennedy yngri, sem er í framboði í forvali Demókrataflokksins fyrir forsetakosningar næsta árs, vettvang til þess að dreifa upplýsingafalsi um bóluefni í vinsælum hlaðvarpsþætti sínum í síðustu viku. 

Kennedy er þekktur andstæðingur bóluefna og samsæriskenningasinni og bróðursonur John F. Kennedy, fyrrverandi Bandaríkjaforseta. Hann hefur meðal annars boðað löngu hraktar fullyrðingar um tengsl bóluefna við einhverfu í börnum.

Rogan brást við gagnrýninni með því að skora á Hotez að rökræða við Kennedy í þættinum. Hét hann að greiða hundrað þúsund dollara til góðs málefnis að vali Hotez ef hann féllist á kappræðurnar. 

Hotez sagðist tilbúinn að koma í þátt Rogan en ekki til að rökræða við Kennedy þar sem það hefði lítið upp á sig.

Musk, eigandi Twitter, tísti að Hotez væri hræddur við opinbera umræðu „vegna þess að hann veit að hann hefur rangt fyrir sér“. Sakaði hann Hotez um að vera mögulega illa við góðgerðarstarf.

Biðu eftir honum við heimili hans

Í kjölfarið byrjuðu andstæðingar bóluefna að áreita Hotez á netinu. Tveir þeirra gengu enn lengra og mættu fyrir utan heimili hans og hæddust að honum fyrir að þekkjast ekki boð Rogan á sunnudag. Hann var þá á leið heim með konu sinni eftir bakarísferð.

„Hann tróð snjallsímamyndavél í andlitið á mér og spurði hvort ég ætlaði að rökræða við RFK [Robert F. Kennedy] hjá Rogan. Þeir biðu greinilega eftir mér. Þetta er mjög dapurlegt. Það eina sem við ætluðum að gera var að ná í köku fyrir feðradaginn,“ segir Hotez um atvikið við Washington Post.

„Þetta fólk kemur yfirleitt ekki heim til mín. Maður hefur alltaf áhyggjur af því hvort að það sé vopnað. Ég ætlaði ekki að bíða eftir að komast að því,“ segir Hotez.

Hvorki Spotify, sem hýsir hlaðvarp Rogan  né Kennedy brugðust við fyrirspurnum blaðsins um áreitið. Rogan sjálfur hefur ekki tjáð sig opinberlega um það heldur.

Rogan er þekktur fyrir að grafa undan bóluefnum gegn kórónuveirunni. Hann hefur sætt gagnrýni fyrir að dreifa upplýsingafalsi um Covid-heimsfaraldurinn í þætti sínum sem milljónir manna hlusta á að staðaldri. Á sínum tíma hét hann því ræða við fleiri viðurkennda sérfræðinga í þætti sínum.

Versta bylgjan í tuttugu ár

Fyrr í síðustu viku kallaði Stephen Bannon, fyrrverandi skrifstofustjóri Hvíta hússins í tíð Donalds Trump, Hotez „glæpamann“.

Hotez, sem tók þátt í þróun bóluefnis gegn Covid-19 og var virkur í að hrekja ósannindi um faraldurinn og bóluefnin, segir að árásir andstæðinga bóluefna komi í bylgjum.

„Þessi núna er um það bil eins slæm og nokkur hefur verið undanfarin tuttugu ár,“ segir hann.

Eftir samskiptin við Rogan um helgina segir Hotez, sem er gyðingur, hafa fengið morðhótanir og skilaboð með nasistatáknum. Öryggisgæsla við vinnstað hans og heimili hefur verið aukin.