Draga enga ályktun af banaslysinu á Sighvati

Kolbeinn Tumi Daðason skrifar 7. september 2023 14:00

Eftirlitsmyndavélar Sighvats. Myndavélarnar eru með upptökubúnaði sem virkjast við hreyfingu. Búnaðurinn var hins vegar á verksmiðjustillingum (default) sem nam illa hreyfingu og vistaði ekki allt sem myndavélin nam. Skipstjórinn var að beygja skipinu og var hann því ekki stöðugt að horfa á skjáinn meðr eftirlitsmyndavélunum. RNSA

Rannsóknarnefnd samgönguslysa dregur enga ályktun af banaslysi sem varð á línuskipinu Sighvati GK 57 norðarlega á Eldeyjarbanka norðvestan af Garðskaga þann 3. desember síðastliðinn. Þetta kemur fram í skýrslu rannsóknarnefndarinnar sem birt hefur verið á vef nefndarinnar.

Í skýrslu nefndarinnar segir að skipverjinn hafi verið að kasta út færi og baujum í svokölluðu millibóli þegar hann féll útbyrðis. Um þrjátíu mínútur liðu áður en aðrir skipverjar áttu sig á því að eitthvað hefði komið fyrir.

Í skýrslunni er viðbrögðum skipverja lýst og leit sem stóð yfir í þrjá daga. Fjölmörg skip komu að leitinni auk þess sem leitast var við kafbát. Einstaka munir tengdir manninum fundust í sjónum en maðurinn fannst aldrei.

Fram kemur í skýrslunni að skipið, sem var að leggja línu, hafi haft það verklag að þeir sem voru á vakt skiptust á verkum á millidekki. Tveir skipverjar uppi í færarými tóku eftir því að færi drógust eftir skipinu sem var fest í bauju og belgi. Þegar þeir drógu það inn sáu þeir að það var skorið.

Skipverjarnir tengdu nýtt færi við línuna og vörpuðu baugu og belgjum í sjóinn. Svo fóru þeir strax að leita að skipverjanum sem átti að vera í færarými. Hann fannst ekki. Gaf skipstjórinn þá fyrirmæli um að skera á línuna og hélt í samráði við Landhelgisgæsluna á nálægan stað. Áhöfnin var öll sett á útkikk án árangurs.

Skipverjar sem gáfu skýrslu telja þá eina skýringu mögulega að maðurinn hafi flækst í færi þegar verið var að leggja línu og fallið með því útbyrðis.

Ekkja mannsins hefur höfðað mál um að maðurinn skuli teljast látinn. Vísað var til þess í stefnu sem birt var í Lögbirtingablaðinu á dögunum að ekki sé hægt að gefa út dánarvottorð eða ganga frá skiptum á dánarbúi mannsins nema ákveðið verði fyrir dómi að telja hann látinn.

Algengara er en ekki að rannsóknarnefndin álykti um slysin í þeim tilgangi að draga af þeim lærdóm. Nefndin ályktar ekki í málinu.

Samgönguslys Leit að skipverja á Sighvati GK-57 Grindavík