Kvika stefnir á sölu eða skráningu TM

Þetta segir í tilkynningu Kviku til kauphallar, sem birt var á áttunda tímanum í kvöld. Þar segir að ákvörðunin sé hluti af framtíðarsýn Kviku þar sem lögð er áhersla á að einfalda rekstur samstæðunnar og styrkja hefðbundna bankastarfsemi í samræmi við markmið bankans um að auka samkeppni og einfalda fjármál viðskiptavina.

Gert sé ráð fyrir að eftir sölu eða skráningu TM verði meginstarfsemi Kviku á sviði viðskipta- og fjárfestingabankastarfsemi auk eignastýringar.

Búist við bættri eiginfjárstöðu

Búist sé við því að eiginfjárstaða Kviku styrkist verulega þegar af sölu eða skráningu TM verður, sem geri bankanum kleift að styðja við innri vaxtartækifæri hans á öllum sviðum. Þá sé meðal annars horft til þess að með auknu eigin fé geti bankinn styrkt markaðsstöðu sína og aukið áhættudreifingu lánabókar frá því sem nú er bæði á sviði einstaklings- og fyrirtækjalána.

Enn fremur sé stefnt að því að umtalsverður hluti söluandvirðis verði greiddur til hluthafa í formi arðgreiðslu og/eða endurkaupa á eigin bréfum.

Stefna á sölu eða skráningu á á síðari hluta næsta árs.

Á næstu vikum muni bankinn ráða ráðgjafa og ákvarða næstu skref, en áætlanir geri ráð fyrir að sölu eða skráningu TM verði lokið á síðari hluta næsta árs.

Stefnt sé að því að nánari kynning á áætlunum bankans í kjölfar fyrirhugaðrar sölu verði haldin í tengslum við uppgjör þriðja ársfjórðungs, sem sé gert ráð fyrir að verði 2. nóvember næstkomandi.

Takmörkuð samlegðaráhrif af trygging- og bankastarfsemi

„Með sölu eða skráningu á TM er ætlunin að Kvika geti sótt enn frekar fram og aukið markaðshlutdeild sína á öllum tekjusviðum bankans. Rekstur og skipulag bankans verður einfaldara, tekjumyndun stöðugri, arðsemi betri og framtíðarvaxtatækifæri meiri,“ er haft eftir Ármanni Þorvaldssyni, sem tók nýverið aftur við forstjórastól Kviku banka.

Frá sameiningu Kviku við TM hf. og Lykil fjármögnun hf. árið 2021 hafi sameinað félag náð miklum árangri í lækkun rekstrarkostnaðar og fjármagnskostnaðar, sem hafi skilað hluthöfum Kviku umtalsverðum verðmætum. 

„Stór hluti samlegðarinnar sem náðst hefur fólst í sameiningu lánastarfsemi Lykils við Kviku, en takmörkuð tekjusamlegð hefur verið af tryggingastarfsemi og bankastarfsemi samstæðunnar. Því er það mat stjórnenda að það sé hagkvæmara bæði fyrir Kviku og TM að skilja TM frá samstæðunni og styrkja verulega bankastarfsemi okkar í kjölfarið.“

Á sama tíma sé félagið sannfært um að TM, sem sé einstaklega vel rekið og verðmætt tryggingafélag með öflugan mannauð, muni geta vaxið og dafnað enn frekar með nýju eignarhaldi. Það hafi verið frábært að vinna með öllu því öfluga starfsfólki sem TM hefur á að skipa og mikil eftirsjá verði af því fyrir annað starfsfólk Kviku. 

„Við munum þó starfa áfram saman á næstu mánuðum.“