Hafa náð fót­festu á austur­bakka Dnipro

Landgönguliðarnir hafa náð fótfestu við þrjú þorp á austurbakkanum. Þeir eru þó ekki góðri stöðu og eru sagðir vera færri en rússneskir hermenn á svæðinu, eins og víðast hvar annarsstaðar á vígstöðvum Úkraínu. Þeim hefur þó tekist að skera á minnst eina birgðalínu Rússa á svæðinu og binda vonir við að geta sótt fram.

Samkvæmt heimildarmönnum Wall Street Journal hafa Úkraínumenn flutt nokkra brynvarða Humvee-jeppa yfir ána og að minnsta kosti einn bryndreka. Takist þeim að flytja frekari herafla og bryn- og skriðdreka yfir ána vonast þeir til að geta brotið sér leið í gengum varnir Rússa.

Varnir Rússa á þessu svæði eru mun umfangsminni en þær eru í Sapórisjíahéraði, í suðurhluta Úkraínu, þar sem Úkraínumenn reyndu að sækja fram í sumar. Það reyndist gífurlega erfitt og þá að miklu leyti vegna stórra jarðsprengjusvæða og umfangsmikilla varna sem Rússar höfðu byggt upp á svæðinu eins og skotgrafir og byrgi.

Þessar varnir eru ekki til staðar í nærri því sambærilegu umfangi í Kherson og fari sókn Úkraínumanna gífurlega vel gætu þeir skorið á birgðalínur Rússa til Krímskaga. Það tæki þó langan tíma.

Allt frá því Rússar hörfuðu frá vesturbakka Dnipro-ár í nóvember í fyrra hafa Úkraínumenn gert regluleg áhlaup yfir ána. Þar hafa þeir ráðist á rússneska hermenn, tekið fanga eða upplýsingar og hörfað aftur.

Áin sjálf er náttúrulegur tálmi sem hefur gert Rússum kleift að stytta víglínuna og styrkja varnir sínar í Sapórisjía.

Nú hafa Úkraínumenn náð fótfestu á austurbakkanum og koma þær fregnir frá báðum fylkingum. Rússneskir herbloggarar segja hart barist við bæinn Krynky. það hefur verið staðfest af myndefni sem birt hefur verið á netinu.

Hart barist í austri

Rússar hafa undanfarnar vikur sótt mjög hart fram gegn Úkraínumönnum í austurhluta landsins á nokkrum vígstöðvum. Mjög svo harðir bardagar hafa geisað við bæinn Avdívka, sem Rússar hafa reynt að umkringja.

Avívkda er í raun úthverfi Dónetsk-borgar og hefur verið lýst sem hliðinu að borginni, sem er höfuðborg samnefnds héraðs og hefur verið í höndum Rússa frá 2014. Þá innlimuðu þeir Krímskaga ólöglega og studdu aðskilnaðarsinna í austurhluta Úkraínu.

Bærinn hefur því verið í fremstu víglínu frá 2014 og er mjög víggirtur. Myndefni frá Avdívka gefur til kynna að Rússar hafi orðið fyrir gífurlegu mannfalli á svæðinu.

Sjá einnig: Rússar sækja hart fram í austri

Rússar hafa einnig gert árásir við Kúbíansk og sunnar í Dónetskhéraði en sérfræðingar bandarísku hugveitunnar Institute for the study of war segja Rússa líklega vilja ná frumkvæðinu í átökunum að nýju og stýra ferðinni að fullu aftur.

Í einföldu máli snýst það að hafa frumkvæðið í hernaði um að þvinga andstæðinginn til að bregðast við aðgerðum þínum og þannig stýra hvar bardagar eiga sér stað og hvenær.

Úkraínumenn höfðu frumkvæðið í vor en enginn virðist hafa það þessa stundina.

Takist Úkraínumönnum að bæta stöðu sína í Kherson og mögulega sækja fram í héraðinu, myndu Rússar líklega þurfa að flytja hersveitir úr austri til að aðstoða við varnir í Kherson.

Varpa tugum sprengja á degi hverjum

Ári eftir að Rússar hörfuðu frá Kherson-borg, einu héraðshöfuðborginni sem Rússar höfðu náð í innrásinni sem hófst í febrúar í fyrra, hafa þeir gert fjölmargar loft- og stórskotaliðsárásir á borgina, jafnvel þó Vladimír Pútín, forseti Rússlands, hafi innlimað Kherson-hérað og borgina í rússneska sambandsríkið í fyrra.

Úkraínumenn segja tugum sprengja varpað á borgina og nærliggjandi byggðir á degi hverjum. Embættismenn segja 2.706 sprengjum hafa verið varpað á héraðið í síðasta mánuði.

Blaðamenn Washington Post ræddu nýverið við Oleksandr Andrienko, sem býr í þorpinu Kozatske, skammt frá Kherson. Hann segir árásirnar linnulausar. Um tvö hundruð manns halda enn til í þorpinu, en það er minna en tíu prósent af íbúum þorpsins fyrir innrás Rússa.

Andrienko missti á dögunum annan fótinn í sprengjuárás Rússa. Tveimur vikum fyrir það var handsprengju varpað úr dróna á bíl hans og særðist hann þá á öxl.

„Þorpið okkar er næstum því farið,“ sagði Andrienko. „Stundum skjóta þeir úr skriðdrekum eða varpa loftsprengjum. Þeir rústa öllu. Ég veit ekki af hverju þeir skjóta á okkur með þessum hætti.“

Læknir sem einnig var rætt við segir þorp á bökkum Dnipro verða fyrir sérstaklega mörgum árásum. Hann segir að hann hafi verið fangelsaður og pyntaður af Rússum þegar Kherson var hernumin.

„Þeir vilja ógna okkur og brjóta þjóð okkar á bak aftur,“ sagði læknirinn.