Úti­lokar ekki að leita réttar síns: „Hafna því al­farið að hafa beitt eða hvatt til of­beldis“

Þetta kom fram í Bítinu á Bylgjunni í morgun. Þar ræddi Ragnar frétt Morgunblaðsins um það að forsvarsmenn sjóðsins hefðu kvartað formlega yfir framgöngu Ragnars í mótmælum á skrifstofu hans.

Haft er eftir Árna Guðmundssyni, framkvæmdastjóra Gildis, að þeir starfsmenn sem urðu vitni að mótmælunum hafi upplifað þau sem ógnun og andlegt ofbeldi. Ragnar segist alls ekki hafa gengið harðar fram en aðrir á skrifstofu Gildis.

Segir mótmælin hafa friðsamlega fram

Málið tengist mótmælum sem áttu sér stað á skrifstofu sjóðsins í síðustu viku en markmiðið með þeim var að þrýsta á stjórnendur lífeyrissjóðsins að gera meira fyrir íbúa Grindavíkur.

Var eitthvað í ykkar framkomu sem gæti gert það að verkum að þarna gætu starfsmenn hafa upplifað þetta þannig eins og þarna er lýst?

„Alls ekki, að mínu mati. Alls ekki. Þetta fór afskaplega friðsamlega fram. Það voru þarna snörp orðaskipti á milli annars formanns Sjómannafélags Grindavíkur, formanns þess og Árna Guðmundssonar forstjóra en þetta fór mjög vel fram.“

Ragnar segist ekki átta sig á samhenginu í bréfinu frá forsvarsmönnum Gildis. Þarna hljóti þá allir sem mætt hafi til mótmælanna að vera undir en ekki bara hann.

Gekkst þú ekkert harðar fram en aðrir?

„Alls ekki. Ég tók varla til máls. Ég held ég hafi leiðrétt Árna Guðmundsson einu sinni eða tvisvar með bara afskaplega yfirveguðum og rólegum hætti.“

Telur málið snúast um gagnrýni sína á kerfið

Ragnar minnir á að málið snúist um lífskjör Grindvíkinga. Þeir horfi upp á hækkandi útgjöld og lífeyrissjóðir séu þeir einu sem ekki hafi brugðist við því.

Af hverju heldurðu að þú sért tekinn út fyrir sviga í þessari grein?

„Ég held að það sé nú bara fyrst og fremst það að ég hef verið mjög gagnrýninn á lífeyrissjóðakerfið. ég hef til dæmis bent á það að frá ársbyrjun síðasta árs hafi lífeyrissjóðirnir tapað um átta hundruð milljörðum, ekki milljónum, milljörðum að raunvirði á fjárfestingum,“ segir Ragnar.

„Ég hef gagnrýnt launakjör þeirra sem stjórna þessum sjóðum, þar sem heyrir til undantekninga ef framkvæmdarstjóri eða stjórnandi sé með undir þrjátíu milljónir á ári og fólkið sem er að fá greitt úr þessum sjóðum býr ekki við þann raunveruleika sem margir sem þarna stýra búa við.“

Gögnin muni styðja frásögn hans

Þú ert nú ekki einn um það?

„Ég er ekki einn um það. Ég hef kannski verið framarlega í þeim flokki. Hvort að það sé ástæðan eða ekki....en ég hafna því alfarið að hafa beitt eða hvatt til ofbeldis. Það geta allir sem þarna voru í okkar hópi vitnað um og munu gera það núna á næstunni.“

Ragnar segir allt saman hafa verið tekið upp á síma. Hópurinn sé með töluvert af gögnum sem styðji frásögn Ragnars. Málið verði ekki látið ótalið.

„En að sama skapi vil ég bara ítreka að þetta beinist ekki gegn starfsfólki sjóðsins á nokkurn hátt. Þetta beinist gegn yfirstjórn lífeyrissjóðsins og við erum einfaldlega að kalla eftir svörum.“

Hlusta má á viðtalið í heild sinni í spilaranum að neðan. 

Segir flesta í áfalli

„Auðvitað bregður manni við svona ásakanir. En stuðningurinn sem ég hef fengið frá fólki sem var þarna á svæðinu, bæði þingmenn, formenn annarra félaga, er bara ómetanlegur.“

Hvenær bárust þér þessar ásakanir?

„Bréfið kom rétt um þrjúleytið í gær sem sent var á alla stjórn félagsins. Og ég bara er að vinna úr þessu. Ég hef komið bæði bréfinu og þeim yfirlýsingum sem hafa komið frá sjóðnum til míns lögmanns sem er bara að fara yfir málið.“

Þinn persónulegi lögmaður eða lögmaður VR?

„Minn persónulegi lögmaður, að sjálfsögðu.“

Þannig að þú ætlar að fara með þetta lengra?

„Við erum bara að fara yfir málið.“

Ragnar segist vænta þess að von sé á yfirlýsingu frá þeim sem mættu til mótmælanna. Stjórn Eflingar hafi meðal annars fundað þarna á sama tíma og mætt til að styðja málstað félaganna.

„Ég held það séu bara flestallir sem voru þarna á staðnum í áfalli yfir þessum fréttum sem voru að koma núna. Þessum alvarlegu ásökunum.“