Góm­sætar og grænar upp­skriftir

Lífið á Vísi setti saman lista með einföldum og gómsætum vegan-uppskriftum sem ættu að gleðja bragðlaukana.

Daglegi græni og góði drykkurinn

Linda Benediktsdóttir deildi einfaldri uppskrift af grænum drykk sem samanstendur af grænmeti, ananas og kókosvatni.

Hráefni:

• Ein lúka spínat
• 1/3 agúrka
• Eitt stórt eða tveir meðal stórir sellerí stilkar
• 1 1/2 dl frosinn ananas
• 1 cm bútur af engifer
• 250 ml kókosvatn 
• 100-200 ml vatn (má sleppa)

Aðferð:

Skolið grænmetið og skerið niður agúrkuna og selleríið í aðeins minni bita svo það passi í blandarann. Flysjið engiferið áður en það er sett í blandarann. 

Hellið kókosvatninu í blandarann, getið sett meira kókosvatn ef þið viljið. 

Avókadó spaghettí

„Ég nota mjög oft edamame spaghettí og svartbauna spaghettí þegar ég vil sleppa kjöti en samt vera viss um að fá nóg af próteini í máltíðina,“ segir matarbloggarinn Helga Margrét. 

Helga Magga deildi girnilegri og einfaldri uppskrift af svartabauna spaghettí með avókadósósu.

Hráefni:

250 gr af edamame- eða svartbauna spaghettí.

Innihald í grænu sósuna

• Þrjú til fjögur lítil avokadó
• Einn til tveir hvítlauksgeirar
• 10 gr fersk basilíka 
• 1 mtsk af sítrónu eða límónusafa
• 1 tsk salt og pipar
• 150 ml vatn af spaghettíinu

Aðferð:

Byrjið á að sjóða spaghettíið eftir leiðbeiningum á kassanum í um 7 mínútur. Á meðan það er að sjóða setjið þá avókadó, hvítlauk, basiliku, sítrónusafa, krydd og vatnið af spaghettíinu í blandara eða matvinnsluvél og maukið saman. 

Smakkið til og bætið ef til vill meira af sítrónusafa út í, eða meira af salti og pipar. Blandið spaghettíinu og sósunni saman og berið fram með salati, og ef til vill hvítlauksbrauði. Einnig er hægt að setja sósu og spaghettí á hvern disk óblandað, eins og hentar. 

Skemmtilegt að skreyta diskinn með svörtum sesamfræjum. Þessi uppskrift er ætluð fyrir fjóra. 

Hér að neðan má sjá Helgu töfra fram réttinn á met hraða.

Bragðmikil sveppasúpa með timían og chili

Á vefsíðunni Gerum daginn girnilegan má finna gómsæta uppskrift af bragðmikilli sveppasúpu sem kítlar bragðlaukana.

Hráefni:

• 2 msk ólífuolía
• 1 stk meðalstór laukur
• 400 g sveppir
• 2 tsk fljótandi hvítlaukur 
• 2 tsk fljótandi timían 
• 1 tsk fljótandi chili
• 700 ml vatn
• 2 stk sveppateningar
• 1 msk grænmetiskraftur
• 1 stk kókosmjólk
• Sjávarsalt og nýmalaður svartur pipar eftir smekk

Aðferð:

Saxið laukinn smátt og sveppina í sneiðar. Hitið olíu í potti og setjið sveppi og lauk út í. Steikið þar til grænmetið fer að brúnast. Bætið kryddum saman við og steikið áfram í nokkrar sekúndur. Setjið vatn, kraft og kókosmjólk út í og látið suðuna koma upp. Súðan er látin malla í 10 mínútur-  smakkið til og bætið við með salti og pipar. 

Takið tvær til þrjár stórar ausur af súpunni og vinnið í matvinnsluvél. Hellið maukaðri súpunni aftur út í pottinn. Hægt að mauka alla súpuna en þá með því að nota töfrasprota beint út í pottinn. Njótið með ylvolgu nýju brauði.

Kalt núðlusalat með hnetusmjörsósu

Systurnar og ástríðukokkarnir Helga María og Júlía Sif deildu girnilegri uppskrift af köldu núðlusalati með einfaldri og bragðmikilli hnetusmjörsósu og fersku grænmeti á vefsíðu þeirra veganistur.is.

Hráefni:

1 pakki glass núðlur 

Sirka 1 bolli af smátt sneiddu rauðkáli

1 stór gulrót

1/2 rauð paprika

1/2 gul paprika

2 litlir vorlaukar

1/2 dós lima baunir 

1 dl saxað ferskt kóríander (og aðeins meira til að bera fram með ef fólk vill)

1 dl gróft saxaðar salthnetur 

Aðferð:

Byrjið á að útbúa núðlurnar samkvæmt leiðbeiningum á pakkanum, en þá eru þær lagðar í bleyti í soðið vatn í þrjár mínútur. Hellið vatninu af og skolið núðlurnar vel upp úr köldu vatni svo þær haldi ekki áfram að eldast.

Skerið allt grænmetið niður í þunnar ræmur. Passið að skera gulræturnar extra þunntþ Skolið lima baunirnar vel. Útbúið sósuna, og hrærið öllu saman í stóra skál. Berið fram með söxuðum jarðhnetum, fersku kóríander og lime sneið.

Hnetusmjörssósa

• 1 dl fínt hnetusmjör
• 1 dl vatn
• safi úr 1 lime
• 2 msk sojasósa
• 1 kúfull teskeið sambal oelek frá santa maria (chillimauk)
• 1 msk hlynsíróp
• 1 msk sesamolía
• 1 hvítlauksrif
• sirka 1 cm af fersku engifer

Aðferð:

Byrjið á því að hræra saman hnetusmjöri og vatni. Best er að blanda saman 1 dl af hnetusmjöri við 1/2 dl af vatni mjög vel og bæta síðan restinni af vatninu út í og hræra vel saman.

Rífið niður hvítlaukinn og engifer mjög fínt. Blandið restinni af hráefnunum saman við hnetusmjörið.

Kjúklingabauna takkó með avokadó

Mexíkóskur matur er nokkuð vinsæll kostur á íslenskum heimilum. Hægt er að útfæra uppskriftirnar eftir eigin þörfum og smekk hvers og eins.

Hér að neðan má finna gómsæta vegan útgáfu af takkó með kjúklingabaunum, avókadó, límónukremi og chilí krönsi. Uppskriftin er fengin af vefsíðunni Gerum daginn girnilegan.

Hráefni:

• 8 stk litlar takkó-kökur
• 1 stk dós kjúklingabaunir
• 1 msk olía
• 4 tsk heimagert takkó-krydd
• 4 msk vatn
• Rifið ferskt rauðkál
• Rauð paprika skorin í litla bita
• Ferskt kóríander
• Eat Real snakk með chili og lemon

Avocado-límónu krem

• Ein dós Oatly hafrarjómaostur
• ½ stk safi úr hálfri límónu
• ½ stk þroskað avókadó
• ½ tsk hvítlauksduft
• ¼ tsk chiliduft
• Salt og pipar eftir smekk
• Nokkrar greinar ferskt kóríander

Heimagert taco krydd

• 2 tsk reykt paprikuduft
• 1 tsk hvítlauksduft
• 1 tsk laukduft
• 1 tsk cumin
• 1 tsk þurrkað kóríander
• 1 tsk salt
• ½ tsk svartur pipar
• ¼ tsk cayenne pipar
• 1 tsk maizena mjöl

Aðferð:

Byrjið á því að blanda saman takk´´o kryddinu, setjið til hliðar.

Útbúið avokadó-límónukremið. Setjið öll innihaldsefnin í lítinn blandara og blandið vel.

Hellið vatni af kjúklingabaununum og hreinsið hýðið af ef vill en þess þarf þó ekki endilega.

Setjið olíu á pönnu og hitið. Hellið kjúklingabaununum út á pönnuna og setjið 3-4 tsk. af takkókryddinu saman við. Steikið í smástund og hellið vatni saman við.

Saxið grænmetið og steikið takkó-kökurnar á grillpönnu.

Samsetning:

Setjið avokadó-límónu krem fyrst á taco köku, því næst kjúklingabaunir, svo grænmeti og endið á snakkinu.