Snorri geri ekkert öðru­vísi en Guð­mundur

Athygli vakti að íslenska þjálfarateymið tók ekki leikhlé allan síðari hálfleikinn. Serbar tóku leikhlé seint í leiknum sem virtist gera meira fyrir Ísland heldur en þá serbnesku, sem voru þá með fín tök á leiknum.

„Hann tók ekki leikhlé í seinni hálfleik. Phil Jackson gerði þetta alltaf hjá Lakers,“ segir Bjarni Fritzson. „Mér fannst það galið,“ segir Einar Jónsson. „Þetta var komið í algjört óefni.“

„Ég væri til í að vita hvað hann var að pæla. Þú ert með tvö tækifæri til að fá þér vatn, eða til að spjalla aðeins og leggja línurnar.“ segir Bjarni.

Ísland tókst á ótrúlegan hátt að jafna leikinn í lokin eftir að hafa verið í eltingaleik allan síðari hálfleikinn. Grannþjóð Serba, Svartfjallaland, er næst á dagskrá í kvöld.

Í þættinum var því velt upp hvort áherslubreytingar Snorra sæjust á leik íslenska liðsins. Einar var á því að svo væri ekki.

„Æfingaleikirnir sýndu manni ekki neitt. menn eru að tala um hátt tempo og eitthvað slíkt en ég sá engar breytingar, ekki neinar,“ segir Einar.

„Það var ekki nein breyting, ekki nein. Ég er ekki að segja þetta á neikvæðan hátt en þetta er tilhneigingin þegar þú ert kominn í alvöru leik, þar sem er mikil spenna og allt þetta. Það var verið að gagnrýna Guðmund Guðmundsson fyrir þetta en það var farið í nákvæmlega sama farið,“ segir Einar.

Þáttinn má heyra í spilaranum að ofan. Besta sætið er aðgengilegt á öllum helstu hlaðvarpsveitum, t.a.m. á Spotify hér. Hver einasti leikur Íslands á EM verður gerður upp af sérfræðingum í Besta sætinu.