Gengu út úr tíma í Haga­skóla og fóru í verk­fall fyrir Palestínu

Kristín Ólafsdóttir fréttamaður náði tali af skipuleggjendum skólaverkfallsins, þeim Birtu og Ragnari, fyrir utan Hagaskóla eftir að þau gengu út úr tíma klukkan hálf ellefu.

Að neðan má sjá viðtal Kristínar við nemendur Hagaskóla áður en þau lögðu af stað niður í bæ í morgun.

„Við erum að fara í verkfall til að styðja Palestínu. Þetta er hræðilegt sem er að gerast í Palestínu og við viljum fjölskyldusameiningar og íslenska kennitölu fyrir palestínskt fólk,“ segja Birta Hall, Ragnar Eldur Jörundsson og Atlas Njálsson sem eru í hópi þeirra sem skipulögðu verkfallið.

Og eruð það þið sem skipuleggið þetta?

„Já við vorum að heimsækja tjaldið sem var á Austurvelli en svo tekið niður og við fengum hugmyndina að halda verkfall til að styðja fólkið sem er hérna á Íslandi,“ segir Ragnar.

Atlas útskýrir að fluttar verði ræður á Austurvelli og svo verði hefðbundin mótmæli.

Katla Hólm og Ingunn Brynja segja það hafa verið auðvelda ákvörðun að taka þátt.

Að neðan má sjá myndir frá mótmælum Hagskælinga á Austurvelli. 

Og hvað viljið þið sjá að verði gert? Af hverju eruð þið að mæta?

„Bara til að styðja, bara til að sýna samstöðu og vonumst eftir vopnahlé - já samstöðu.“

Fram kom í máli nemendanna að skiptar skoðanir væru í skólanum varðandi verkfallið. Sumum nemendum hefði þótt hreinlega of kalt að fara að mótmæla. Þá voru aðrir sem mótmældu sérstaklega einstökum stjórnmálamönnum og mátti sjá skilti sem kallaði eftir afsögn Bjarna Benediktssonar utanríkisráðherra. Einn nemandinn lýsti því að honum fyndist ekki mikið rætt um ástandið fyrir botni Miðjarðarhafs innan veggja skólans.

Víðar var mótmælt í morgun en þegar krakkarnir héldu á Austurvöll mættu þau hópi sem var fyrir utan Ráðherrabústaðinn í reglulegum mótmælum fyrir utan ríkisstjórnarfund.

Á Austurvelli bættust nemendur í Háteigsskóla meðal annars í hópinn.