Trump græddi milljarða dala í dag

Mjög fljótt eftir að fyrirtækið var skráð jókst virði þess um fjörutíu prósent. Síðan þá hefur það aukist enn meira en þegar þetta er skrifað hefur virði hlutabréfanna aukist um tæp fimmtíu prósent.

Fyrr í dag, þegar hækkunin var um fjörutíu prósent, sagði New York Times að virði hlutabréfa Trumps í félaginu væri um það bil fjórir milljarðar dala. Í heildina var virði fyrirtækisins meira en sex milljarðar dala. Trump á um sextíu prósent í fyrirtækinu.

Verðmæti hlutabréfanna þykir frekar mikið, þar sem það er rúmlega þúsundfaldar áætlaðar árstekjur fyrirtækisins í fyrra. Á fyrstu níu mánuðum síðasta árs voru tekjur þess einungis 3,3 milljónir dala, allar komnar til vegna auglýsinasölu. Á tímabilinu tapaði fyrirtækið 49 milljónum dala.

Virði hlutabréfa Reddit er um tíu sinnum meira en árstekjur þess, hlutfallið hjá META er um sjö og Snap um sex.

Trump stofnaði Truth Social snemma árs 2022, eftir að hann var bannaður á stærstu samfélagsmiðlum Bandaríkjanna eins og Facebook og Twitter, eins og það hét þá, í kjölfar árásarinnar á þinghús Bandaríkjanna þann 6. janúar 2021.

Trump hefur nú verið hleypt aftur inn bæði Facebook og X, eins og miðillinn heitir í dag, en hann hefur þó enn sem komið er að mestu haldið sig við Truth Social. Þar hefur hann dælt út færslum um skoðanir sínar á hinum ýmsu málefnum eins og hann gerði á Twitter á árum áður.

Í dag gagnrýndi hann til að mynda saksóknara og dómara í dómsmálum gegn honum og lýsti því yfir að hann elskaði Truth Social og sannleikann.

Eins og fram kemur í frétt AP fréttaveitunnar hefur Truth Social ekki náð mikilli dreifingu vestanhafs hjá öðrum en íhaldssömum stuðningsmönnum Trumps. Sérfræðingar segja mikla hægri slagsíðu á umræðunni á samfélagsmiðlinum og þar sé einnig mikið af hatursorðræðu og öfgum, þar sem ritstjórn er lítil sem engin.

Virkir notendur Truth Social eru um fimm milljónir á mánuði, samkvæmt greinendum sem blaðamenn AP vísa í. Um þrír milljarðar nota Facebook, um tveir nota TikTok og um fimm hundruð milljónir Reddit.