Óskar Hrafn hættur hjá Haugesund

Um ákvörðun Óskars Hrafns er að ræða en félagið segir Íslendinginn hafa tjáð sér það í gær að hann hygðist láta af störfum hjá félaginu. Sjálfur vildi Óskar Hrafn ekki tjá sig um viðskilnaðinn við Haugesund í samtali við Vísi er eftir því var leitað. 

Óskar Hrafn var ráðinn þjálfari Haugesund í október á síðasta ári og stýrði hann liðinu í alls sjö leikjum. Félagið hefur nú leit að nýjum þjálfara en Óskar skilur við liðið í 13.sæti norsku úrvalsdeildarinnar.

„Við létum okkur hlakka til góðs samstarfs til lengri tíma en hlutirnir fara ekki alltaf eins og maður áætlar. Við þökkum honum fyrir sitt framlag,“ segir í yfirlýsingu Haugesund. 

Áður en að Óskar Hrafn tók við þjálfun Haugesund hafði hann stýrt liði Breiðabliks yfir nokkurra ára skeið við góðan orðstír og undir hans stjórn var liðið meðal annars Íslandsmeistari árið 2022 og komst svo alla leið í riðlakeppni Sambandsdeildar Evrópu, fyrst íslenskra karlaliða á síðasta tímabili.