„Það sem þú greiðir niður, það kemur aldrei aftur“

Vaxtastuðningurinn er hluti af framlagi ríkisins til kjarasamninga og ætlað að koma til móts við fólk sem fundið hefur fyrir aukinni vaxtabyrði. Ekki þarf að sækja sérstaklega um að fá styrkinn, en hann er reiknaður samkvæmt forsendum sem fyrir liggja í skattframtali, og er ráðstafað í gegnum vefsíðu Skattsins.

Í fréttinni í spilaranum hér að neðan er gerð heiðarleg tilraun til þess að útskýra nánar hvernig réttur hvers og eins til vaxtastuðnings er reiknaður út: 

Stuðningurinn getur mest verið 150 þúsund hjá einstaklingum, 200 þúsund hjá einstæðum foreldrum og 250 þúsund hjá hjónum, en upphæðin tekur mið af tekjum fólks.

Fólk í fyrstu tveimur hópunum má hafa haft allt að sex milljónir í laun, áður en frádrátturinn dettur inn. Eftir það dragast fjögur prósent af hverri krónu umfram milljónirnar sex. Fyrir fólkið í síðasta hópnum kemur sami frádráttur inn eftir samanlagðar tekjur upp á 9,6 milljónir.

Frádrátturinn tekur einnig mið af eignum fólks, en á vefsíðu Skattsins segir: 

Og, ef frádráttur er svo mikill að stuðningurinn reiknast lægri en fimm þúsund krónur, þá fellur hann niður.

Oftast best að borga beint inn á lánið

Fjármálaráðgjafi segir fólk standa frammi fyrir vali um hvort stuðningurinn fari beint inn á húsnæðislán, eða í einstaka afborgun.

„Ég segi að yfirleitt viljum við nú, ef við fáum einhverja peninga í hendurnar, leggja þá beint inn á höfuðstól láns, til þess að lækka lánið. Það er svo mikill ávinningur í því. Það sem þú greiðir niður, það kemur aldrei aftur. Það sem þú hafðir greitt niður mun aldrei bera neina vexti, aldrei neina verðtryggingu. Það er farið og það er hundrað prósent öruggt,“ segir Björn Berg Gunnarsson fjármálaráðgjafi.

Hins vegar geti aðstæður kallað á að fólk nýtti stuðninginn frekar í einstaka afborgun.

„Erfiður yfirdráttur, slæmar visa-skuldir, slæmar raðgreiðslur; eitthvað sem er mjög erfitt að ná, vegna greiðslu af íbúðaláni. Hugsanlega væri þá hægt að nýta þennan vaxtastuðning inn á afborganir, í þessum eina mánuði, ef samsvarandi upphæð er þá notuð til þess að vinna á ennþá verri lánum.“