Tryggja þurfi að vindorkan haldist í höndum þjóðarinnar

Í gær kynnti franska félagið Qair niðurstöður umhverfismats fyrir Dalamönnum en félagið hyggst byggja upp vindmyllugarða í landi Sólheima á Laxárdalsheiði. Landið er í eigu félagsins SBH1 efh., sem var stofnað af Sunnu Birnu Helgadóttur eiginkonu Ásmundar Einars Daðasonar, mennta- og barnamálaráðherra, en er nú í eigu föður hans og föðurbróður.

Eins tilkynnti sveitarstjórn Skeiða- og Gnúpverjahrepps í morgun að til skoðunar sé að kæra útgáfu Orkustofnunar á virkjanaleyfi fyrir fyrirhuguðum vindmyllugarði í Brúfellslundi. Hún segir innviði raforkukerfisins staðsetta í hreppnum þó garðurinn yrði staðsettur í Rangárþingi ytra.

Bjarni Benediktsson forsætisráðherra og Hörður Arnarsson forstjóri Landsvirkjunar, undirrituðu samning um lands- og vindorkuréttindi vegna Búrfellslundar, í dag. Enn á sveitarstjórn Rangárþings ytra eftir að veita framkvæmdaleyfi fyrir verkinu.

Landvernd hefur undanfarna daga gagnrýnt mjög áform um vindorkuver. Formaðurinn kallaði í gær eftir að þau fari ekki fram úr regluverki og eftir heildrænni stefnumörkun í málaflokknum.

Guðmundur Ingi Guðbrandsson, félags- og vinnumarkaðsráðherra og formaður Vinstri grænna, segir mikilvægast að marka stefnu um hvar við viljum að slík orkuver rísi á landi og tryggja að þau séu í eigu þjóðarinnar.

„Þetta verkefni og fjölmargar hugmyndir um allt land um vindorkuverkefni sýna okkur að það er gríðarlega mikil þörf fyrir það að leggja fram stefnumörkun um vindorkuver á Íslandi, þar sem við ákveðum hvar þau geta verið og hvar ekki,“ segir Guðmundur Ingi.

„Ég er reyndar þeirrar skoðunar að við eigum að reisa vindorkuver, ef það er gert á landi, á fáum stöðum, á röskuðum svæðum, eignarhald sé fyrst og fremst ef ekki eingöngu á hendi þjóðarinnar og við tökum eðlilega auðlindarentu af notkun þessarar auðlindar líkt og annarra. Ég er mótfallinn því að raforkuframleiðsla á Íslandi sé í höndum annarra en hins opinbera.“

Sem umhverfisráðherra lagði Guðmundur Ingi fram stefnumörkun í málaflokknum.

„Ég held að það sé algjört forgangsatriði að umhverfisráðherra komi með þetta fram að nýju í haust,“ segir Guðmundur Ingi.

Formaður Landverndar sagði í viðtali í gær að framleidd sé nóg orka á Íslandi en henni þurfi að ráðstafa betur.

„Ég tek undir þetta að mörgu leyti. Við þurfum í fyrsta lagi að spara orku miklu betur en við gerum. Það er líka hægt að draga úr tapi orku með því að styrkja flutningskerfið. Komi til þess að við þurfum að afla nýrrar orku þurfum við að forgangsraða henni vegna aukningar til almennra nota og í þágu innlendra orkuskipta.“

Guðlaugur Þór Þórðarson, umhverfis-, orku- og loftslagsráðherra, lagði fram stefnumörkun í málaflokknum á síðasta þingi sem fékk ekki fram að ganga.

„Ég tel að það þurfi að gera ákveðnar breytingar á því, ég og minn flokkur. Við erum tilbúin til að halda áfram með þá vinnu enda byggir hluti þeirrar vinnu á því sem ég lagði fram á sínum tíma, árið 2021.“

Fréttin var uppfærð 16. ágúst 2024. Í fyrri útgáfu fréttarinnar sagði að landið að Sólheimum í Dalasýslu væri í eigu eiginkonu Ásmundar Einars Daðasonar.