Þykir leitt hvernig kennarar túlkuðu orð sín

„Mér finnst einhvern veginn öll tölfræði, til dæmis bara um skólana okkar, benda til þess að við séum að gera eitthvað algerlega vitlaust. Að kennararnir séu að biðja um það að fá að vera minna með börnum, en eru samt veikari en nokkru sinni fyrr. Kenna minna og með fleiri undirbúningstíma,“ voru ummæli hans sem féllu ekki í góðan jarðveg hjá kennarastéttinni.

Í aðsendri grein á Vísi segir borgarstjóri að það sé einfaldlega hans skoðun að það sé tímabært og nauðsynlegt að umræða fari fram um menntun og skólakerfið með opnum huga.

Einar segir það ljóst að sjónarmið hans hafi ekki komist nægilega vel á framfæri í þeim myndbandsbút sem fór um netið eins og eldur í sínu og uppskar harkaleg viðbrögð kennarastéttarinnar.

„Í óundirbúinni ræðu minni, sem var hluti af stærri umræðu um fjármál sveitarfélaga, benti ég á að veikindahlutfall kennara er um 8-9%. Það er alvarlegt að svo margir kennarar glími við veikindi til lengri eða skemmri tíma en lýsir því álagi sem starfinu og starfsaðstæðum fylgja. Slík fjarvera fagfólks kostar sveitarfélög mikla fjármuni og dregur verulega úr skilvirkni skólastarfsins. Starf kennara er eitt það mikilvægasta í okkar samfélagi og það þarf að standa vörð um heilsufar kennara með tiltækum ráðum,“ segir Einar.

„Eitthvað er að“

Hann segir að þær aðgerðir sem ráðist hefur verið í á síðustu árum til að bæta starfsaðstæður kennara ekki hafa skilað þeim árangri sem til var ætlast. Á Íslandi sé bein kennsla hvers grunnskólakennara minnst á Norðurlöndum, í leikskólum hafi fermetrum á hvert barn fjölgað sem og undirbúningstímum og vinnuvikan stytt.

„Þessar aðgerðir höfðu það að markmiði að lækka veikindahlutfallið og stórbæta aðstæður en þróunin er í öfuga átt. Samkvæmt nýrri könnun sér fjórðungur kennara ekki fyrir sér að endast í starfinu. Eitthvað er að,“ segir Einar.

Tímabært að staldra við

Borgarstjóri segir að honum hafi þótt mikilvægt á ráðstefnunni að draga þessi atriði fram. Hann hafi líka nefnt að það yrði að búa þannig um skólastarf að kennarar væru hamingjusamir í starfi.

Hann spyr sig hvort tímabært sé að staldra við og skoða forsendurnar.

„Skóli án aðgreiningar er að mínu áliti rétt stefna, að öll börn óháð stöðu fái sömu þjónustu og að enginn upplifi sig útundan. En ég vil ræða hvernig okkur gengur með þá stefnu og hvort betur megi fara. Ég ætla að leyfa mér að hafa ekki fullmótaða skoðun á því strax og langar að heyra í ykkur sem best þekkið til mála. Þá verður að horfast í augu við þá staðreynd að 33% barna í leikskólum og 24% barna í grunnskólum borgarinnar eru af erlendum uppruna og þær geysimiklu breytingar sem það hefur á störf ykkar kennara,“ segir Einar.

Reiðubúinn til samtals

Hann segir umfangsmiklar breytingar standa yfir á íslensku menntakerfi og nefnir innleiðingu laga um samþættingu þjónustu í þágu farsældar barna og lög um miðstöð menntunar og skólaþjónustu.

„Það er afar mikilvægt að þessar breytingar nái fram að ganga en til þess þarf öflugt samstarf fagfólks á vettvangi, sveitarstjórna, ráðuneytis og stofnana ríkisins. Reykjavíkurborg mun leggja mikla áherslu á virkan þátt í þessari vinnu,“ segir Einar.

„Kæru kennarar. Það er einfaldlega mín skoðun að það sé tímabært og nauðsynlegt að við ræðum um menntun og skólakerfið með opnum huga. Öll kerfi eru mannanna verk. Ég er reiðubúinn til samtals við ykkur og mér þykir leitt að þið hafið túlkað orð mín þannig að ég beri ekki virðingu fyrir ykkar störfum en því fer fjarri,“ segir hann að lokum.