Fetar ekki í fót­spor for­vera sinna hvað ÁTVR varðar

Þetta sagði Daði Már Kristófersson fjármálaráðherra í óundirbúnum fyrirspurnatíma í þinginu síðdegis. Sigríður Á. Anderssen, þingmaður Miðflokksins, spurði hann út í starfshætti ÁTVR og eftilit sem hann fer með gagnvart „þeirri ríkiseinokunarverslun“.

Tilefni fyrirspurnar Sigríðar var dómur Hæstaréttar í máli áfengisheildsölu sem lagði ÁTVR í deilu um tvær tegundir af bjór. ÁTVR hafði tekið bjórana tvo úr hillum verslana stofnunarinnar vegna viðmiðs um framlegð vara, sem mátti ekki. Lög og reglur kveða á um að eftirspurn skuli ráða för þegar kemur að vöruvali.

Sigríður spurði hvort Daði Már teldi sig hafa heimild til þess að viðhalda þessu ólögmæta ástandi, en engar breytingar hafa enn verið gerðar á því hvernig ÁTVR velur inn vörur.

Hafi erft málið

Daði Már þakkaði Sigríði fyrir fyrirspurnina og sagði málið sem um ræðir vera eitt fjölmargra mála sem hann erfði þegar hann tók við embætti fjármálaráðherra. Það sé rétt hjá Sigríði að verklag ÁTVR hafi ekki verið í samræmi við lög.

„Unnið hefur verið að endurskoðun á reglugerðinni sem byggir á lögunum og hún hefur farið í samráð og um leið og því lýkur mun verða breyting á því verklagi og ÁTVR mun þurfa að endurskoða verklagið.“

„Hundrað ára meinsemd“

Sigríður steig aftur í pontu og sagði Daða Má ekki hafa svarað spurningu sinni, hann hefði ekki svarað því hvort hann teldi sér heimilt að „frysta“ ólögmætt ástand, með því að gera ÁTVR ekki að breyta verklagi sínu til samræmis við lög tafarlaust.

„Mér virðist sem hæstvirtur fjármálaráðherra ætli að feta í fótspor allra fyrirrennara sinna síðustu ára og standa vörð um þessa ríkiseinokunarverslun. Ég ætla hins vegar ekki að vera svo svartsýn og gefa honum tækifæri til þess hér í seinna svari að svara því hvort það komi honum til hugar að gera róttækar breytingar á þessari hundrað ára meinsemd, sem hefur verið hér í íslenskri verslunarsögu.“

Ætlar „á engan hátt að ganga í röð“ forvera sinna

Daði Már þakkaði Sigríði aftur, í þetta skiptið fyrir að minna hann á að svara að fullu fyrirspurn hennar.

„Það er ekki verið að frysta neitt ástand. Það er verið að vinna í þessu máli. Það verða náttúrlega að gilda einhverjar reglur um starfsemi ÁTVR, til þess að gæta jafnræðis. Þetta hefur verið unnið eins hratt eins og kostur er og ég hef ítrekað ýtt eftir því. Ég ætla á engan hátt að ganga í röð þeirra fjármálaráðherra sem ekki hafa sinnt því að gæta að hagsmunum borgaranna gagnvart þessari stofnun, heldur þvert á móti að leiða þar endurbótavinnuna.