Gefur eftir í tollastríði við Kína

Með þessu vonast Trump-liðar til að draga úr spennunni í samskiptum við Kína, samkvæmt frétt Wall Street Journal, en markaðir hafa tekið vel í ummæli Trumps á þessum nótum síðustu daga og þá yfirlýsingu að hann ætli sér ekki að reyna að reka seðlabankastjóra Bandaríkjanna.

Í gær sagði Trump til að mynda að hann væri tilbúinn til að lækka tollana á Kína, sem í mörgum tilfellum eru 145 prósent, en þeir yrðu ekki felldir alfarið niður.

Ráðamenn í Kína sögðust í dag vera tilbúnir til viðræðan við Bandaríkjamenn en ítrekuðu að þeir myndu ekki sitja undir áframhaldandi hótunum frá Hvíta húsinu. Kínverskir heimildarmenn WSJ segja ummæli Trumps í gær hafa verið talin til marks um að hann væri að lúffa.

Eins og áður segir hafa markaðir tekið vel í vendingar síðustu daga. Vísitölur hafa hækkað um allan heim, þó þær séu flestar vel undir þeim hápunkti sem þær náðu fyrr á árinu. Óreiða síðustu vikna hefur haft verulega slæm áhrif á virði hlutabréfa um allan heim.

CNBC hefur eftir Scott Bessent, fjármálaráðherra Trumps, að Bandaríkin og Kína hafi tækifæri á því að ná góðum samningi. Það muni þó taka tíma.

Þegar hann var spurður um frétt WSJ sagðist Bessent ekki vita til þess að umræða sem þessi hefði átt sér stað innan veggja Hvíta hússins. Þá dró hann í efa að það væri rétt.

Hann sagðist þó fastlega búast við menn myndu draga í land, þegar kæmi að viðskiptaátökum Bandaríkjanna og Kína.