Fok­dýr jóla­gjöf til dætranna reyndist ein­tóm blekking

Íris Björk Tanya Jónsdóttir, skartgripahönnuður og athafnakona, keypti í byrjun nóvember á síðasta ári miða af Viagogo á tónleika Billie Eilish í Kaupmannahöfn 28. apríl til að gefa tvíburadætrum sínum í jólagjöf. 

Viagogo er eitt stærsta miðasölufyrirtæki heims en virkar sem milliliður milli kaupanda og seljanda. Íris treysti fyrirtækinu eftir að hafa mörgum sinnum áður keypt miða af fyrirtækinu.

„Greiðslan fer í gegn og allt í góðu og svo koma skilaboðin: ,Þú átt von á miðunum með emaili’,“ segir Íris. Dagarnir liðu en ekkert bólaði á miðunum.

Ítrekuðu að allt væri eðlilegt

Þegar komið var fram í desember fór Íris að hafa áhyggjur af miðunum enda áttu þeir að vera jólagjöf.

„Ég spyr þau ítrekað í desember og þegar janúar kemur spyr ég þau: ,Getur þetta verið eitthvað skrítið?’ og þau segja að þetta sé allt eðlilegt. Ég ætlaði ekkert að fara að bóka flug hingað út nema vera með miða í höndunum,“ segir Íris.

Sjá einnig: Selma Björns bálill eftir að miðasöluvefur eyðilagði draum móður hennar

Hún hafi áfram verið í miklum samskiptum við Viagogo og henni alltaf tjáð að þetta væri eðlilegt, sumir tónleikahaldarar afhendi jafnvel ekki miða fyrr en nokkrum klukkutímum fyrir viðburð.

„Auðvitað var ég orðin pínu skeptísk á að fara hérna út,“ segir hún en þær hafi samt flogið til Kaupmannahafnar á sunnudag enda Viagogo tjáð henni að hún ætti ekki að hafa áhyggjur. 

„Þeir eru á leiðinni“

Svo kom loks dagur tónleikanna í gær, mánudagur.

„Allur dagurinn í gær fór í síma- og email-samskipti við þau. Svo fóru þeir að hætta að svara mér,“ segir Íris.  Samskiptin hafi í ofanálag verið mjög skrítin. 

Hún hafi rætt við starfsmenn í símaverum sem gátu ekki gefið nein svör og vísuðu henni áfram á næsta starfsmann. Alltaf fengust stöðluð svör sem virtust ekki standast.

„Ég sagði við eina konuna: , Geturðu bara sagt mér það, er ég að fara að fá þessa miða?‘ Og þá kom svarið: ,Jújú, þeir koma, þú verður bara að gefa okkur klukkutíma, þeir eru á leiðinni‘,“ segir hún. 

„Eins og þetta væri bara mjög eðlilegt og ég væri að hafa algjörar óþarfa áhyggjur.“

Ekki búin að fá endurgreitt

Tónleikarnir áttu að fara fram klukkan sjö í gærkvöldi og þegar klukkan var orðin fjögur var Íris endanlega búin að gefast upp á að fá miðana.

„Ég veit að við erum ekki að fara að fá þessa miða, segðu okkur það bara frekar,“ sagði hún þá við einn starfsmann símaversins. Þá fékkst svarið: „Jújú, þeir eru að koma, gefðu okkur tíu mínútur í viðbót.“

Eftir samtalið fékk Íris póst þar sem sagði að ekki næðist að afhenda miðana því það næðist ekki í seljandann. Sá hefði þá greinilega selt miðana nokkrum sinnum.

„Það sem mér finnst skrítnast, hvernig getur Viagogo tekið á móti greiðslum og þóknun?“ spyr Tanja.

Íris fékk síðan póst með upplýsingum um hvernig hún gæti keypt aðra miða á sömu tónleika. Hún hafi ekki gert það enda nóg að brenna sig einu sinni á síðunni.

„Ég treysti þessu ekki lengur þannig ég sendi email og óskaði eftir endurgreiðslu. Og ég veit ekkert, það er allavega ekki enn komið. En vonandi og mér skilst að þau séu ábyrgir fyrir endurgreiðslu,“ segir hún.

Hins vegar segir hún að vara þurfi fólk við síðum eins og Viagogo.

„En það þýðir ekkert að vera að pirra sig við fólkið sem er í símaverunum. Þau hafa ekkert með þetta að gera, greyin. Ömurlegt fyrir þau að taka á móti þessum símtölum,“ segir hún.

Tívolí í góða veðrinu í stað Billie

Íris segir leiðinlegt að taka sér frí úr vinnu og skóla, hlakka til að fara á tónleika og kaupa sér miða til útlanda en lenda svo í svona leiðindum.

Verst hafi verið hvernig Viagogo fullvissaði hana ítrekað um að miðarnir kæmu á endanum þegar það var ljóst að þeir kæmu aldrei.

Þrátt fyrir að fá ekki að sjá Billie Eilish náðu mæðgurnar að gera gott úr kvöldinu.

„Við fórum í Tívólí, það var geggjað veður og við nýttum kvöldið vel. Svo er þetta ævintýri og saga í bankann okkar,“ segir Íris. 

Sem betur fer sé Billie Eilish ung og Kaupmannahafnartónleikarnir sennilega ekki hennar síðustu.