Ræða við „hroka­fulla“ Kana vegna á­hyggja af tollum Trumps

Þessar áhyggjur leiddu til þess að ráðamenn í Kína sendu erindreka til viðræðna við Bandaríkjamenn í Sviss um helgina. Þær viðræður eiga sér nú stað og er þeim ætlað að draga úr spennu milli ríkjanna og mögulega opna á nýja viðskiptasamning.

Viðræðurnar milli þessara tveggja stærstu hagkerfa heims gætu haft gífurleg áhrif á hagkerfi heimsins. Viðskiptadeilur ríkjanna hafa þegar komið niður á birgða- og aðfangakeðjum heimsins, eins og fram kemur í grein New York Times.

Eins og frægt er hefur forseti Bandaríkjanna sett 145 prósenta toll á vörur frá Kína og almennan tíu prósenta toll á allar vörur sem fluttar eru til Bandaríkjanna. Þar að auki hefur Trump sett tolla á ál, stál og bíla og heitið því að setja tolla á hálfleiðara og lyf.

Hann hefur einnig boðað umfangsmikla tolla á ríki sem selja meira til Bandaríkjanna en þau kaupa en þeim tollum var frestað um níutíu daga, eftir að þeir voru fyrst boðaðir.

Kínverjar hafa sett 125 prósenta tolla á bandarískar vörur. Þetta hefur þegar haft miklar afleiðingar og hagfræðingar keppast um að lýsa yfir ótta um minni hagvöxt á heimsvísu og mögulegrar kreppu, svo eitthvað sé nefnt.

Bandaríkjamenn hafa meðal annars sakað ráðamenn í Kína um að niðurgreiða mikilvæga hluta hagkerfis þeirra á ósanngjarnan hátt og að flæða markaði heimsins með ódýrum vörum.

Trump hefur gefið til kynna að hann sé tilbúinn til að lækka tollana en talskona hans hefur ítrekað að til þess þurfi Kínverjar að gefa eitthvað eftir. Ráðamenn í Kína hafa sagt að það muni þeir ekki gera fyrr en í fyrsta lagi eftir að tollar hafi verið lækkaðir.

Trump hefur farið fram á beinar viðræður við Xi Jinping, forseta Kína, en því hefur hingað til verið hafnað.

Ósáttir við hrokafull bréf

Reuters hefur eftir heimildarmönnum sínum að ráðamenn í Kína hafi brugðist reiðir við bréfasendingum frá Bandaríkjunum um fantanýl og þeim hafi þátt þau bréf hrokafull. Bandaríkjamenn hafa lengi sakað Kínverja um að selja þau efni sem notuð eru til að framleiða lyfið hættulega í massavís til fíkniefnaframleiðenda vestanhafs, sem flytja efnin svo til Bandaríkjanna.

Ráðamenn í Kína deildu einnig um það hverja hægt væri að senda til viðræðna og ætluðu í fyrstu að reyna að standa á sínu. Að endingu var þó ákveðið að hefja viðræður og þá að stórum hluta vegna áðurnefndra áhyggja.

Í svari frá utanríkisráðuneyti Kína við fyrirspurn Reuters segir að Kínverjar séu ósáttir við misnotkun Bandaríkjamanna á tollum og eru ráðamenn í Washington sakaðir um hrottaskap, sem hafi grafið mjög undan samskiptum ríkjanna og meðal annars varðandi viðræður um fentanýl.

Tónninn frá Peking byrjaði að breytast þann 30. apríl, en þá sögðu kínverskir ríkismiðlar frá því að embættismenn í Bandaríkjunum færu fram á viðræður um tollana.

Ein af ástæðunum þess að Kínverjum hefur snúist hugur um viðræður eru vísbendingar um aukin fjárhagsvanda kínverskra fyrirtækja og vandræði við að finna nýja markaði til að leysa þann bandaríska af hólmi fyrir kínverskar vörur.

Fólk í þróunarríkjum kaupi alls ekki jafn mikið af vörum og Bandaríkjamenn og hafa margir greinendur í Kína breytt hagspám sínum fyrir árið. Varað hefur verið við því, samkvæmt frétt Reuters, að deilurnar gætu kostað Kínverja um sextán milljónir starfa.

Þá óttuðust Kínverjar að sitja einir eftir, þegar þeir horfðu á marga af sínum viðskiptafélögum og keppinautum setjast við samningaborðið hjá Bandaríkjamönnum.