Steinn reistur við með eins konar blöðrum

Þó nokkrar framkvæmdir á vegum Skógræktarfélags Reykjavíkur standa yfir á Esjunni í dag og næstu daga. Steinn sem hefur legið á grúfu í Esjuhlíð síðan í byrjun apríl var reistur við í dag en á næstu dögum verður unnið að viðgerðum á brúnni yfir Mógilsá sem er á miðri leið upp Esjuna.

Verkið hófst klukkan níu í morgun og lauk um klukkan fimm síðdegis. Þrátt fyrir drjúgan tímann sem það tók gekk allt vel að sögn Auðar Kjartansdóttur, framkvæmdastjóra Skógræktarfélags Reykjavíkur, og kúrir Steinninn nú aftur á þeim stað sem Esjufarar eru vanir.

Auður stóð við Stein og kastaði mæðinni þegar fréttastofa náði sambandi við hana í morgun.

„Vonandi tekst okkur að reisa hann við, við ætlum allavega að gera heiðarlega tilraun til þess. Við erum að ferja búnað upp til að hefja framkvæmdir.“

Um þrír til sex unnu að því að reisa Steininn við. Sérfræðingar komu að störfum dagsins enda um flókna framkvæmd að ræða.

„Við ætlum að reyna grafa aðeins bak við hann og búa til svona sæti fyrir hann. Síðan ætlum við að nota svona nánast eins og blöðru sem við blásum upp til að lyfta honum ofan í farið, ef við komum því undir hann. Síðan erum við með einhverjar talíur og alls konar verkfæri. Við ætlum að sjá hvað okkur tekst að gera.“ Svona lýsti Auður aðferðinni sem notuð var með góðum árangri í dag. 

Brúin yfir Mógilsá við Fossalaut er vel komin til ára sinna enda 30 ára gömul. Áætlað er að viðgerð á brúnn taki um fjóra daga. Þó nokkrir lögðu leið sína á Esjuna í dag og virtu framtakið fyrir sér.