Kynna bráðabirgðarúfærslu á strandveiðunum

Í frumvarpinu er lagt til að við lög um strandveiðar bætist nýtt ákvæði til bráðabirgða, sem kveður á um að vikið verði frá skyldu Fiskistofu að stöðva veiðar þegar útlit er fyrir að leyfilegum hámarksafla verði náð.

Gera ráð fyrir auknum kvóta

Í frumvarpinu segir að miðað við fjölda strandveiðibáta í sumar og veiðimynstur undanfarinna ára megi áætla að auka þurfi það aflamagn sem til ráðstöfunar er á strandveiðitímabilinu 2025.

Til að unnt sé að tryggja 48 veiðidaga kunni því að þurfa gera breytingar á því magni sem heimilt er að veiða í hverri ferð. Leyfilegur hámarksafli á dag er sem sakir standa 774 kíló.

Þá segir að á fiskveiðiárinu sé ráðherra heimilt að ráðstafa auknu aflamagni til strandveiða til viðbótar við núverandi aflamagn til strandveiða á fiskveiðiárinu 2024/2025.

„Viðbótaraflamagn skal dragast frá því aflamagni sem dregið verður frá heildaraflamarki skv. 3. mgr. 8. gr. og lækka árlega og skal að fullu fært til baka eigi síðar en á fiskveiðiárinu 2028/2029. Ef til kemur viðbótaraflamagn fiskveiðiárið 2024/2025 skal ráðherra lækka viðbótarráðstöfunina.“

Lagt er til að ráðherra verði veitt heimild til að flytja milli ára aflamagn sem kæmi til úthlutunar á komandi árum innan 5,3 prósent kerfisins.

Hið svokallaða 5,3 prósent kerfi er sá hluti kvótans sem árlega hefur verið tekinn frá fyrir útgerðarflokkana strandveiðar, almennan byggðakvóta, skel- og rækjubætur og línuívilnun.

Í frumvarpinu segir að við mat ráðherra á því hversu mikið aflamagn verði flutt milli ára til veiða á yfirstandandi fiskveiðiári beri að gæta þess að ráðstöfunin verði ekki verulega umfram ráðgjöf Hafrannsóknarstofnunar, og gangi auk þess ekki gegn meginmarkmiðum fiskveiðistjórnunarkerfisins um sjálfbærar fiskveiðar.

Þá segir að frumvarpið hafi þau áhrif á þá sem stunda strandveiðar að þeir hafi meira svigrúm til að nýta þá 48 daga sem strandveiðitímabilið markast við.

„Má því áætla að frumvarpið stuðli að því að útgerð til strandveiða verði stunduð á ábyrgari hátt og tryggi þar með frekar öryggi þeirra er stunda veiðarnar, auk þess að aflamagn dreifist betur yfir tímabilið og milli landshluta.“

Svipta skip veiðileyfinu verði brotið gegn reglum um eignarhald

Í frumvarpinu er einnig lagt til að þrátt fyrir 24. gr. laga um stjórn fiskveiða og 15. gr. laga um umgengni um nytjastofna sjávar, skuli Fiskistofa svipta skip leyfi til strandveiða ef brotið er gegn ákvæðum laga og reglugerða um skilyrðu um eignarhald lögaðila, eignarhald strandveiðibáta og lögskráningu.

Samkvæmt reglugerð frá 2024 um strandveiðar er einungis heimilt að veita hverri útgerð, eiganda, eisntaklingi eða lögaðila, leyfi til strandveiða fyrir eitt fiskiskip.

Um borð í hverri strandveiðiferð skuli vera einn einstaklingur sem er lögskráður á skipið og á að lágmarki beint eða óbeint í gegnum lögaðila, meira en 50 prósent eignarhlut í skipinu.

„Brjóti leyfishafi gegn framangreindum ákvæðum reglugerðarinnar skal Fiskistofa svipta viðkomandi skip leyfi til strandveiða. Í þessum tilvikum er þá ekki beitt áminningu, heldur er sviptingu leyfis vegna framangreindra brota beitt.“

„Þá verði Fiskistofu einnig skylt að svipta skip leyfi til strandveiða fyrir ítrekuð brot gegn ákvæðum laga og reglugerða um það aflamagn sem heimilt er að draga í hverri veiðiferð.“