Meidd og mætir Ís­landi ekki á EM: „Á­fall fyrir Noreg“

Frá þessu er greint í norskum fjölmiðlum núna í morgun en Bergs­vand er reynslu­mikill miðvörður sem byrjaði alla leiki norska liðsins í Þjóða­deildinni á þessu ári að undan­skildum loka­leiknum gegn Sviss þar sem að hún gat ekki spilað vegna meiðslanna sem hún hafði orðið fyrir í leik nokkrum dögum áður gegn Ís­landi.

Bergs­vand fór meidd af velli gegn Ís­landi undir lok síðasta mánaðar í Þjóða­deildinni en hvort að sömu meiðsli og hún hlaut þar séu að halda henni frá þátt­töku á EM skal látið ósagt. Þess er hið minnsta ekki getið í yfir­lýsingu norska knatt­spyrnu­sam­bandsins.

„Þetta er slæmt fyrir norska liðið. Bergs­vand hefur verið einn stöðugasti leik­maður norska lands­liðsins,“ segir Kri­stof­fer Løkberg, sér­fræðingur NRK. „Það er áfall fyrir Noreg að hún verði ekki með.“

Bergs­vand hefur leikið stórt hlut­verk í varnar­línu Noregs upp á síðkastið og myndað sterkt miðvarðapar með Mat­hild­e Harvi­ken, leik­manni ítalska félagsins Juventus. Inn í norska hópin ní stað Bergs­vand kemur hin 24 ára gamla Mart­hine Østen­stad, leik­maður Brann.

Noregur er með Ís­landi í A-riðli komandi Evrópumóts, liðin mætast í loka­um­ferð riðla­keppninnar þann 10.júlí næst­komandi en þar mun norska liðið ekki geta reitt sig á krafta Bergs­vand í hjarta varnarinnar.

Ekki er ýkja langt síðan að Bergs­vand, sem er 31 árs gömul, samdi við þýska stór­liðið Wolfs­burg en hún hafði frá árinu 2023 spilað með enska félaginu Brig­hton og þar áður í heima­landinu með liðum á borð við Brann og Stabæk.