„Þær eru bara of dýrar“

Fasteignamarkaðurinn hefur kólnað síðustu mánuði þrátt fyrir að virkni á markaði sé enn töluverð. Færri íbúðir seljast á yfirverði og algengt er að verð sé lækkað í söluferli. Nýjum íbúðum á markaði fjölgar þar sem fáar þeirra seljast. Fjórtán hundruð nýjar íbúðir eru á sölu á höfuðborgarsvæðinu og hafa þær ekki verið fleiri frá upphafi mælinga 2018.

Of stórt bil

Páll Pálsson fasteignasali segir mun á meðalverði eldri íbúða og nýbygginga vera orðinn of mikinn, en munurinn er tæp þrjátíu prósent.

„Bilið má ekki vera mikið meira en fimmtán til tuttugu prósent svo eignir á nýbyggingamarkaði seljist. Þannig það er stærsta ástæðan, þær eru bara of dýrar þó það séu líka aðrar ástæður. Það er ekki verið að byggja rétt, sem er ekki endilega verktökunum að kenna, svo er fjármagnskostnaður ofboðslega dýr. Um áttatíu prósent af öllum sem reyna að kaupa sér nýbyggingu eiga ekki möguleika á að kaupa,“ segir Páll.

Fastur á leigumarkaði

Páll vísar þarna í mánaðarskýrslu HMS sem kom út fyrir helgi, en einungis tekjuhæstu tuttugu prósent landsmanna stæðust greiðslumat fyrir nýjum íbúðum á höfuðborgarsvæðinu með lágmarks eigið fé.

„Ég er að eiga við einstakling þessa dagana sem hefur ekki efni á því að eiga íbúð, ekki að greiða af íbúðinni þó hann eigi nóg eigið fé. Hann er samt að leigja og nær að borga leiguna í hverjum mánuði en kemst ekki í gegnum greiðslumat. Þetta er ummerki þess að þessi einstaklingur sé fastur á leigumarkaði. Þú þarft að vera með tvennar tekjur. Til að eiga möguleika þurfa kaupendur að vera par og taka verðtryggt lán. Það eru allir að bíða eftir lækkun vaxta sem er ólíklegt að gerist á þessu ári,“ segir Páll.