„Það nægir ekki ESB að rústa eigin iðnaðar­fram­leiðslu“

Evrópusambandið hyggst leggja verndartolla á járnbeldni og kísiljárn frá Íslandi og öðrum EES-ríkjum eins og Noregi. Evrópusambandið tilkynnti EES-ríkjunum þetta í vikunni.

Skrifstofustjóri hjá utanríkisráðuneytinu segir að endanleg ákvörðun hafi ekki verið tekin um þetta af hálfu Evrópusambandsins og Ísland muni áfram eiga í samtali við ESB.

Framkvæmdastjórn ESB hafi hafið rannsókn í desember síðastliðnum til að kanna hvort ástæða væri til að grípa til verndarráðstafana vegna innflutnings á járnblendi og kísil.

Hið manngerða ESB óveður

Sigmundur Davíð segir í færslu á samfélagsmiðlum að rigning pirri hann ekki, en hið „manngerða ESB óveður sem við höfum þurft að þola þetta sumarið“ geri það.

Segir hann að fundur utanríkismálanefndar í kjölfar heimsóknar Ursulu von der layen hafi verið undarlegasti nefndarfundur sem hann hefur setið.

„Aðalatriðið virtist vera að segja að hin steindauða umsókn Íslands um ESB-aðild væri enn lifandi þvert á það sem komið hefur fram hjá Evrópusambandinu síðastliðinn áratug.“

„Fullyrt var að ESB hafi allt í einu komist að þeirri þversagnakenndu niðurstöðu að þrátt fyrir að Ísland væri sannarlega ekki umsóknarríki væri Ísland samt enn með virka umsókn.“

Þá segir Sigmundur að á fundinum hafi utanríkisráðherra lagt áherslu á hversu vel ríkisstjórnin og ráðuneytið stæðu sig í hagsmunagæslu gagnvart ESB.

„Ekki var minnst einu orði á áform ESB um nýja tolla gagnvart Íslandi og Noregi sem munu hafa gríðarleg áhrif á iðnað í þessum löndum (það nægir ekki ESB að rústa eigin iðnframleiðslu).“

„Í Noregi er hin þó ESB-sinnaða ríkisstjórn fjúkandi ill yfir þessu. Sú íslenska lítur þó væntanlega svo á að best sé að styggja ekki ESB heldur þiggja höggin athugasemdalaust svo pótintátar þar haldi áfram að segja það sem þarf til að plata Íslendinga inn í sambandið,“ segir Sigmundur.

Diljá Mist Einarsdóttir, þingmaður Sjálfstæðisflokksins, hafði svipaða sögu að segja í viðtali við Morgunblaðið, þar sem hún sagði skrýtið að lesa um jafn stórt mál og þetta tollamál í norskum fjölmiðlum. Engar upplýsingar hafi fengist um málið frá stjórnvöldum, sem hafi komið á óvart þar sem fundað hafi verið í vikunni með utanríkisráðherra.