Gæti átt yfir höfði sér þrjá­tíu ára fangelsi

Brown fylgdist með í gegnum sjónvarp í héraðsdómi Miami-Dade þar sem lögmaður hans, Mark Eiglarsh, ítrekaði að Brown hefði þegar lýst yfir sakleysi sínu. Honum var sleppt úr fangelsi í síðustu viku gegn 25 þúsund dala tryggingu og gert að bera GPS-ökklaband.

Ákæra fyrir tilraun til manndráps í Flórída getur í mörgum tilfellum varðað allt að fimmtán ára fangelsisdómi. Aðstoðarríkissaksóknarinn Stephanie Cruz sagði að þar sem Brown hafi að sögn notað byssu gæti hann átt yfir höfði sér tvöfalt lengri fangelsisvist vegna refsiþyngingar fyrir notkun skotvopns. Lögin fela einnig í sér mögulegan tuttugu ára lágmarksdóm við sakfellingu.

Hinn 37 ára gamli Brown sagði ekkert meðan á réttarhaldinu stóð. Engin dagsetning hefur verið ákveðin fyrir réttarhöldin.

Brown er sakaður um að hafa gripið skammbyssu af öryggisverði eftir hnefaleikakeppni fræga fólksins í Miami þann 16. maí og skotið tveimur skotum að manni sem hann hafði lent í slagsmálum við fyrr um daginn. Zul-Qarnain Kwame Nantambu sagði rannsakendum að önnur kúlan hefði snert háls hans.

Lögmaður Brown sagði í fyrra réttarhaldi að rangt væri farið með og að Brown hefði í raun notað sitt eigið skotvopn og skotunum hefði ekki verið beint að neinum. Brown hefur sagt á samfélagsmiðlum að hann hafi verið að verja sig gegn árás og að aðrir hafi reynt að stela skartgripum af honum.

Brown lék í tólf ár í NFL-deildinni og var þá einn allra besti útherji deildarinnar. Hann lék síðast með Tampa Bay árið 2021 þar sem hann vann Super Bowl með leikstjórnandanum Tom Brady. Hann var stærstan hluta ferils síns hjá Pittsburgh. Hann tortímdi ferli sínum í lokin sem endaði með að hann gekk af velli í miðjum leik. Eftir það vildi enginn semja við hann.

Brown var framseldur í síðustu viku frá Dúbaí eftir að handtökuskipun vegna ákæru um tilraun til manndráps var gefin út í júní