Fall á lyfja­prófi reyndist eistnakrabbamein

Broncos unnu leikinn 10-7 þann 6. nóvember síðastliðinn og átti Singleton bókaða aðgerð daginn eftir leik eftir að hafa fengið voveifleg tíðindi örfáum dögum fyrr.

„Þessi vika var tilfinningarík,“ segir Singleton í samtali við breska ríkisútvarpið, BBC. „Ég velti því fyrir mér hvort þetta yrði minn síðasti leikur á ævinni. Hvernig aðgerðin myndi ganga og hvernig líkaminn myndi bregðast við meininu.“

„En ég vissi að ef þetta væri minn síðasti leikur að ég myndi skilja hvern einasta dropa af blóði og svita eftir á vellinum,“ segir Singleton sem er leiðtogi í einni sterkustu vörn deildarinnar hjá Denver-liðum.

Hann átti níu heppnaðar tæklingar í leiknum og degi síðar var æxlið fjarlægt. Hann fékk ekki aðeins grænt ljós á að halda ferli sínum áfram í kjölfarið heldur var hann mættur aftur á völlinn með liðsfélögum sínum á sunnudaginn síðasta – 23 dögum eftir aðgerð.

Fékk fyrir hjartað

Singleton hafði fengið bréf í skáp sinn á æfingasvæði Broncos merkt „trúnaðarmál“ þann 29. október. Í því bréfi stóð að hann hefði fallið á lyfjaprófi þar sem hormónið hCG hefði mælst sérlega hátt eftir leik tveimur vikum áður.

„Ég hugsaði: Þetta er galið. Ég skildi ekki hvernig þetta gæti hafa gerst. Ég gúgglaði hormónið og þá kemur upp að þú þurfir annað hvort að sprauta því í þig eða þú sért með eistnakrabbamein,“ segir Singleton.

„Ég fríka út, fer heim og segi konunni minni frá þessu og að ég sé ekki að taka neitt inn. Svo fer ég til læknis,“ bætir hann við.

Hann greindist með æxli í eista mánudaginn 3. nóvember og segir aldrei neitt annað hafa komið til greina en að spila leikinn fimmtudaginn eftir.

„Stærsti óttinn var sá að leikurinn og ferillinn yrði tekinn af mér, og ekki á mínum eigin forsendum. Ég fór á fund með stjórnendum liðsins, við ræddum málin og niðurstaðan var að ef ég treysti mér andlega til þess fengi ég að spila,“ segir Singleton.

Singleton missti aðeins af einum leik vegna veikindanna, sterkum sigri á Kansas City Chiefs þann 16. nóvember.

Eins og áður segir var hann mættur aftur á völlinn á sunnudaginn var þegar Broncos unnu 27-26 sigur á Washington Commanders eftir framlengdan leik. Hann verður þá í eldlínunni þegar liðið mætir Las Vegas Raiders á sunnudagskvöldið.

Eftir að hafa tapað tveimur af fyrstu þremur leikjum tímabilsins hafa Broncos unnið níu leiki í röð. Liðið er langt komið með að tryggja sæti sitt í úrslitakeppninni og er efstir í vesturriðli AFC-deildarinnar með 10 sigra og tvö töp.

Allt stefnir í að Broncos vinni riðilinn í fyrsta skipti í 10 ár en Kansas City Chiefs hafa unnið hann níu ár í röð.