Ekkert stríð við Porto og ein­stakur Þor­steinn ní­tjándi maður

„Þorsteinn er í dag meiddur,“ sagði Snorri á blaðamannafundinum í dag þegar hann kynnti átján manna EM-hópinn sinn. Þorsteinn, sem meiddist í nára í leik með Porto í nóvember, er skráður aukamaður og verður með á æfingum þegar hann getur. Ef allt gengur að óskum fer hann með sem „nítjándi maður“ til Svíþjóðar 14. janúar, áður en Ísland mætir Ítalíu í fyrsta leik 16. janúar.

Þorsteinn sagði frá því við Vísi að hann hefði viljað sinna endurhæfingu sinni á Íslandi en forráðamenn Porto ekki tekið vel í það.

Vildu vissulega fá Þorstein fyrr heim

„Það er mjög mikilvægt að halda því til haga að öll samskipti okkar við Porto hafa verið mjög góð. Þetta er ekki þannig að við séum í einhverju stríði við þá og verið vesen að fá hann heim. Þorsteinn meiðist í leik með sínu liði og við tók mjög flott og góð greining, og meðhöndlun á hans meiðslum. Vissulega vildum við fá hann fyrr heim en það voru góðar og gildar ástæður fyrir því hjá Porto að halda honum,“ sagði Snorri í dag.

„Auðvitað setur þetta töluvert strik í reikninginn gagnvart allar mínar pælingar. Ef að þróunin verður eins og hún hefur verið er planið að fara með nítján menn út. Steini er á leiðinni til landsins og fer í læknisskoðun strax á morgun hjá okkar sjúkraþjálfurum og Örnólfi [lækni],“ sagði Snorri.

Snorri benti á að eitt lítið bakslag gæti þýtt að Þorsteinn ætti enga von um að spila á EM og að allir sem þekktu til tognunarmeiðsla væru meðvitaðir um hættuna á því.

„Þorsteinn er með eitthvað sem enginn annar hefur. Hann er rúmlega tveir metrar, getur skotið fyrir utan og hefur komið vel inn í þetta á undanförnum árum. Það er klárlega missir að hann sé ekki með,“ sagði Snorri.

Donni þriðji kostur en með eitthvað öðruvísi

Staðan á Þorsteini spilaði inn í ákvörðun Snorra um að taka Donna með á mótið. Þorsteinn er vissulega rétthentur og Donni örvhentur en báðir búa yfir hæfileikanum til að skapa mikla skotógn utan af velli.

„Donni hefur eitthvað öðruvísi sem hinir hafa ekki. Skot fyrir utan og annað slíkt, sem mér fannst fínt að hafa með í þessum 18 manna hópi. Þess vegna ákvað ég að kippa honum með,“ sagði Snorri sem er hins vegar með Ómar Inga Magnússon sem sinn aðalsóknarmann og einnig Viggó Kristjánsson á undan Donna í goggunarröðinni. Þá er Teitur Örn Einarsson hornamaður en þekkir að spila skyttustöðuna.

„Þetta er langt og strangt mót. Viggó hefur verið í smávandræðum með skrokkinn á sér og verið mjög heiðarlegur með það. Það er ekkert leyndarmál að ég nálgast þetta verkefni með Ómar Inga og Viggó númer 1 og 2, Donni veit það og ég fór vel yfir það með honum. Þetta er ekkert grafið í stein og þetta getur breyst.“