Ríkjandi meistarar Frakka bíða strákanna okkar

Þetta varð ljóst í kvöld eftir að Ísland vann Slóveníu og Frakkland hafði betur gegn Austurríki, á fjögurra liða æfingamóti í Frakklandi.

Sigur Íslands á Slóveníu var afar öruggur en Frakkar áttu í meiri vandræðum með að hrista Austurríkismenn af sér, þó að þeir hafi á endanum unnið fimm marka sigur, 34-29.

Frakkar voru vel studdir í hinni risastóru höll Paris La Défense Arena en höfðu lengst af aðeins naumt forskot og voru 18-16 yfir í háfleik. Munurinn var aðeins eitt mark, 28-27, þegar sjö mínútur voru eftir en Frakkar reyndust sterkari á lokasprettinum.

Markvörðurinn Charles Bolzinger átti góða innkomu og var valinn maður leiksins.

Ítalir fögnuðu sigri í Þórshöfn

Það verða því Frakkland og Íslands sem mætast í úrslitaleik mótsins á sunnudaginn, klukkan 16 að íslenskum tíma, áður en liðin halda svo á Evrópumótið þar sem þau munu ekki mætast nema í fyrsta lagi í undanúrslitum eða leik um sæti.

Fyrsti leikur Íslands á EM verður við Ítalíu á föstudaginn eftir slétta viku. Ítalir eru staddir í Færeyjum og unnu þar fyrri leik sinn við heimamenn í kvöld, 36-34, eftir að Færeyingar höfðu verið 19-17 yfir í hálfleik.