Þrír af Strákunum okkar í upp­talningu á þeim bestu fyrir EM

Umfjöllun sænska miðilsins er ítarleg en fulltrúar miðilsins hafa valið fimm leikmenn í hverri stöðu vallarins úr þeim landsliðum sem hafa unnið sér þátttökurétt á komandi Evrópumóti sem fer fram í Danmörku, Svíþjóð og Noregi. 

Það kemur fæstum á óvart að Ómar Ingi Magnússon, leikmaður Magdeburgar, sé einn þeirra leikmanna sem talinn er upp sem besta hægri skyttan á EM.

„Nánast enginn leikmaður hefur skorað jafn ört fyrir sitt lið eins og Ómar Ingi hefur gert fyrir Magdeburg í aðdraganda móts,“ segir í umfjöllun Handbollskanalen. „Hann hefur á ný náð þeim háa stalli sem hann stóð á fyrir nokkrum árum þegar að hann vær nær óstöðvandi. Hafandi í huga leikformið hjá Ómari Inga sem og liðsfélaga hans Gísla Þorgeiri er staðan mjög áhugaverð fyrir Ísland.“

Og talandi um Gísla Þorgeir Kristjánsson, liðsfélaga Ómars Inga hjá Magdeburg, þá telja spekingar Handbollskanalen hann vera einn af fimm bestu leikstjórnendunum á komandi Evrópumóti.

„Hann hefur verið öflugur á tímabilinu og er enn einn af þeim bestu í sinni stöðu á heimsvísu. Hraður, skapandi, óttalaus og mjög mikilvægur fyrir íslenska landsliðið á komandi Evrópumóti.“

Þá er Orri Freyr Þorkelsson, sem hefur farið mikinn með liði Sporting Lissabon á tímabilinu talinn vera einn besti vinstri hornamaður mótsins. 

„Leikmaður sem var hvergi nærri svona lista fyrir nokkrum árum síðan en hefur síðan þá tekið risastór skref í sinni þróun sem leikmaður. Markaskorari sem Sporting getur treyst á og er nú byrjunarliðsmaður í vinstra horninu hjá Íslandi. Eitthvað sem segir mér að þetta verður ekki í síðasta sinn sem við sjáum Orra Frey á svona lista.“

Komandi Evrópumót í handbolta hefst á fimmtudaginn kemur, þann 15.janúar. Íslenska landsliðið spilar í  F-riðli mótsins með Ungverjalandi, Póllandi og Ítalíu. Fyrsti leikur Strákanna okkar er á föstudaginn gegn Ítalíu.