„Er í góðu standi og klár í hvað sem er“

Haukur kom virkilega sterkur inn í íslenska liðið í dag og losaði að miklu eyti um hnút sem hafði verið að gera íslenska liðinu erfitt fyrir.

Fljótlega eftir innkomu Hauks skoraði hann tvö mörk, fiskaði víti og gaf stoðsendingu í fjórum af fimm síðustu sóknum Íslands í fyrri hálfleik.

„Síðan kom þetta og við löguðum það. Þá náum við ágætis forystu og höldum fókus út allan leikinn í 60 mínútur.“

Haukur fékk vel að finna fyrir því frá varnarmönnum pólska liðsins, en lét það vægast sagt ekki á sig fá.

„Þú ert eiginlega bara að segja mér fréttir, ég tók ekki eftir því. Ég var bara staðráðinn í að koma inn og koma með eitthvað að borðinu. Ég held að ég hafi bara gert það vel.“

Þá segir Haukur að þrátt fyrir að hafa ekki alltaf átt sinn besta dag í landsliðstreyjunni þá hafi það ekki verið léttir að vera með betri mönnum vallarins í kvöld.

„Ég myndi ekki segja léttir. Bara eins og ég kom inn á þá var ég staðráðinn í að koma inn og gera þetta vel. Eins og allt liðið þá held ég að við höfum gert vel í 60 mínútur. Við héldum fókus þó svo að einhverjir hlutir hafi ekki verið að ganga upp í byrjun. Litlir hlutir eins og dauðafæri og tæknifeilar sem telja mikið. Um leið og við löguðum það þá kom þetta.“

Hann segir einnig erfitt að segja til um það hvað hafi valdið því að hann spilaði betur í dag en oft áður í treyju íslenska landsliðsins.

„Ég er alltaf vel stemmdur. Það er erfitt að segja. Ég er alltaf vel stemmdur og alltaf geðveikt að spila fyrir íslenska landsliðið. Heiður.“

„Sérstaklega hérna í dag, þar sem fílingurinn er eins og við séum á heimavelli. Það eru bara forréttindi. Eins og ég kom inn á þá var ég bara gíraður í að koma inn á og gera vel.“

Þá segir Haukur að umræðan um að hann hafi ekki alltaf skilað sínum besta leik með landsliðinu hafi ekki haft áhrif á hann.

„Nei, alls ekki. Það er ekkert sem truflar mig og skiptir mig litlu máli. Það er margt þegar maður lítur til baka, sem ég er meðvitaður um, og margir sénsar sem ég hefði getað nýtt betur og allt það. En ekkert sem hefur einhver áhrif. Ég er í góðu standi og klár í hvað sem er.“

Að lokum segir Haukur að það hafi verið extra sætt að eiga góðan leik gegn Pólverjum, en hann lék í nokkur ár með pólska stórliðinu Kielce.

„Já það var gaman. Það voru nokkrir gamlir félagar þarna og gaman að mæta þrim og hitta þá aftur eftir tímann með þeim í Póllandi. Já, extra sætt,“ sagði Haukur að lokum.