Tölur á móti Slóvenum: Slóvenar með tólf fleiri tapaða og Ís­land 13-0 í hraða­upp­hlaupsmörkum

Íslenska landsliðið stakk af í seinni hálfleiknum með 6-2 spretti snemma í seinni hálfleik og eftir það var stressið í burtu og íslensku strákarnir léku sér að slóvenska liðinu út leikinn. Sigurinn var aldrei í hættu.

Hræðileg nýting úr dauðafærum var saga fyrri hálfleiks þar sem Miljan Vujovic varði átta dauðafæri frá íslensku strákunum auk þess sem eitt dauðafæri endaði í stönginni.

Sem betur fer pössuðu Slóvenar illa upp á boltann á móti. Þeir nýttu skotin sín sjötíu prósent í fyrri hálfleik en töpuðu níu boltum á meðan íslenska liðið tapaði engum bolta. Sú tölfræði hélt okkur á floti sem mótvægi við öll klúðrin úr dauðafærunum. Það er ekki oft sem Ísland er plús níu í töpuðum boltum í einum hálfleik.

Slóvenar fengu auk þess öll sex vítin sem voru dæmd í fyrri hálfleik og þau nýtti Domen Novak af öryggi. Sex af síðustu átta mörkum slóvenska liðsins í fyrri hálfleiknum komu úr vítaköstum.

Í seinni hálfleik héldu Slóvenar áfram að tapa boltanum og íslenska liðið refstaði ítrekað með mörkum úr hraðaupphlaupum og hröðum sóknum. Ísland var 13-0 yfir í hraðaupphlaupsmörkum og þvingaði alls fimmtán tapa bolta á meðan íslenska liðið tapaði aðeins þremur boltum allan leikinn. Í öllum þremur var boltinn dæmdur af íslensku strákunum. 

Óðinn Þór Ríkharðsson skoraði ekki aðeins sjö mörk heldur fiskaði hann einnig þrjá ruðninga á Slóvenana.

Ómar Ingi Magnússon fór að hjálpa Gísla Þorgeiri Kristjánssyni við að sprengja upp varnarleik Slóvena en þeir komu saman af 23 mörkum íslenska liðsins. Ómar Ingi átti sinn besta leik á hárréttum tíma. Gísli bjó alls til fjórtán skotfæri en í sex þeirra klikkuðu liðfélagar hans í dauðafæri.

Markvarslan var ekki góð en liðið vann hvern boltann á fætur öðrum í vörninni og sýndi afburðasóknarleik eftir að strákarnir fóru að nýta betur dauðafærin.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fyrsta leik Íslands á mótinu.