Töl­fræðin á móti Króötum: Ómar nýtti öll skotin en aðrir fóru illa með dauðafærin

Íslenska liðið missti Kóatana frá sér í upphafi leiks og var að elta allan tímann. Liðið náði muninum niður í eitt mark en tókst aldrei að brúa bilið.

Íslenska liðið bjó til færi allan leikinn en hvert dauðafærið á fætur öðru fór forgörðum. Ómar Ingi Magnússon nýtti öll tólf skotin sín í leiknum en restin af liðinu nýtti aðeins 21 af 39 skotum, eða 54 prósent. Mörg af þessum átján misheppnuðu skotum komu úr dauðafærum.

Elliði Snær Viðarsson var búinn að nýta skotin sín frábærlega í síðustu tveimur leikjum en byrjaði þennan á því að klikka á þremur skotum á upphafsmínútunum. Það var ekki tóninn sem íslensku strákarnir vildu gefa í upphafi og eftir þetta var heldur betur á brattann að sækja.

Íslensku strákarnir fóru áfram illa með dauðafærin og þegar Snorri Steinn Guðjónsson tók leikhlé eftir rúmar þrettán mínútur var íslenska liðið fjórum mörkum undir og aðeins búið að nýta 2 af 9 skotum sínum utan af velli. Ómar Ingi Magnússon var að skila vítunum rétta leið en lítið gekk hjá öðrum úr öðrum færum.

Viktor Gísli Hallgrímsson varði varla bolta en Björgvin Páll Gústavsson kom inn og tók nokkra bolta og um leið var munurinn kominn niður í tvö mörk. Króatíska liðið seiglaðist áfram og skoraði hvað eftir annað ódýr mörk upp úr engu þegar sóknir þeirra voru að renna út í sandinn.

Íslenska vörnin réð líka lítið við Tin Lucin sem kom að níu mörkum í fyrri hálfleik með sex mörkum og þremur stoðsendingum.

Íslenska liðinu tókst ekki að snúa við dæminu í seinni hálfleik fyrr en allt of seint.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fyrsta leik Íslands á mótinu.

Hér fyrir neðan má sjá toppa íslenska liðsins í tölfræðinni.