„Ætla bara að vera stór og stoltur af þessu liði“

„Þetta er fáránlega súrt. Þetta er gríðarlega svekkjandi. Mér fannst mómentið vera þarna. Mér fannst við vera með ákveðið móment í byrjun þar sem við fáum aragrúa dauðafæra og getum komið okkur í góða stöðu og sett þá undir pressu. Í staðinn klikkum við og þeir hafa það nokkuð þægilegt allan leikinn og þetta var svolítið endurtekið efni í fyrri hálfleik, eins og þetta var í Malmö,“ sagði Gísli í samtali við Henry Birgi Gunnarsson og vísaði til eins marks tapsins fyrir Króatíu, 29-30, í fyrsta leik Íslands í milliriðli.

„Við vorum aftur aðeins of linir. Boltinn lekur hvað eftir annað inn og mörg svekkjandi mörk sem við fengum á okkur. Við náðum aldrei að setja þá í óþægilega stöðu.“

Sóknarleikur Íslands og Króatíu er býsna ólíkur. Íslendingar treysta meira á gegnumbrot á meðan Króatar skjóta mikið utan af velli. Gísli var þó ekki endilega sammála því að íslenska liðið hefði þurft að hafa meira fyrir mörkunum sínum en það króatíska.

„Ég veit það ekki. Þeir spila þessa gríðarlega erfiðu 5-1 vörn sem snýst um það að vera þolinmóður. Það þýðir ekki að stilla upp í eitt skot með fjórar hendur á móti. Það er það sem þessi vörn vill. Við fáum að mínu mati færin sem við viljum fá í þessum leik. Við skoruðum 33 mörk en klikkuðum á 12-13 dauðafærum,“ sagði Gísli.

„Ég vil heldur ekki taka neitt frá markverðinum þeirra. Hann er frábær. Ég spila með honum í Magdeburg. Það er eitthvað sem vantaði.“

Tapið í Herning í dag var þriðja tap Íslands fyrir Króatíu á stórmóti á einu ári. Þótt það sé sárt gengur Gísli stoltur frá mótinu.

„Mér er ekki skemmt. Ég get orðað það þannig. Þetta er ekkert geðveikt. Þessi leikur mun svíða næstu mánuði en ef við þysjum aðeins út er ég ótrúlega stoltur af þessu jákvæða skrefi sem við tókum sem lið í þessu móti,“ sagði Gísli.

„Við erum samstilltari, meira lið, þéttari og allir á sömu blaðsíðu hvað varðar plan og skipulagið okkar. Ég ætla bara að vera stór, stoltur af þessu liði og er spenntur fyrir komandi mótum.“

Viðtalið við Gísla má sjá í spilaranum hér fyrir ofan.