Gísli Þor­geir og Viktor Gísli á toppnum en Óðinn í öðru sæti

Hver lét netið oftast syngja á EM? Hver var bestur í að finna samherja sína? Hvaða markvörður varði flest skot? Og hver eyddi mestum tíma á handboltavellinum?

Danir tryggðu sér Evrópumeistaratitilinn en hvaða leikmenn sköruðu fram úr á mótinu?

Gísli Þorgeir Kristjánsson var ekki aðeins valinn í úrvalsliðið heldur var hann einnig sá leikmaður sem gaf flestar stoðsendingar á samherja sína. Gísli endaði með sex fleiri stoðsendingar en Daninn Mathias Gidsel. Gísli fiskaði líka flest víti á mótinu.

Gidsel varð markakóngur Evrópumótsins og setti nýtt EM-markamet með því að skora 68 mörk á mótinu. Hann var eins og áður sagði einnig í öðru sæti í stoðsendingum og kom því að langflestum mörkum eða meira en fjörutíu prósentum marka danska liðsins.

Ísland átti fleiri menn á toppnum en Gísla Þorgeir því Viktor Gísli Hallgrímsson varði flest víti allra markavarða á mótinu eða níu talsins. Hann varði einu víti fleira en Daninn Emil Nielsen. Viktor Gísli varð síðan í þriðja sætinu yfir flest varin skot.

Óðinn Þór Ríkharðsson varð í öðru sæti á eftir Gidsel í flestum spiluðum mínútum. Gidsel var sá eini sem spilaði í meira en átta klukkustundir en hann var inni á vellinum í átta klukkustundir og tuttugu mínútur. Óðinn Þór varð annar því hann var inni á vellinum í sjö klukkustundir og fjórtán mínútur. Ísland átti alls fjóra leikmenn á topp tíu yfir flestar spilaðar mínútur því Viktor Gísli Hallgrímsson varð fimmti, Elliði Snær Viðarsson áttundi og Ómar Ingi Magnússon níundi.