„Þeir setja pressu á alla og gera allt ó­þægi­legt“

„Hlynur Bæringsson, þú útskýrir kannski fyrir okkur það sem þú kallar aggressjón hjá Stjörnumönnum. Hvernig þeir eru að koma inn í leikina á báðum endum vallarins,“ sagði Stefán Árni Pálsson. Stjarnan skoraði 35 stig í fyrsta leikhluta á móti Stólunum og Garðbæingar voru strax komnir sextán stigum yfir.

Snöggir úr vörn í sókn

„Í fyrsta lagi sjáum við bara hvað þeir eru bara ‚physical' út um allan völl. Þeir pressa og svo eru þeir svo snöggir úr vörn í sókn,“ sagði Hlynur og ráðleggur áhorfendum að læra af Stjörnuliðinu.

„Lærið af þessu, hvað þeir eru snöggir upp. Þeir setja pressu á alla því þeir setja ekki bara pressu á góða skotmenn eða bakverði. Þeir setja pressu á alla og gera allt óþægilegt,“ sagði Hlynur.

Hann bendir á það að Stjörnumenn séu með marga líkamlega sterka leikmenn.

Þetta var bara töff

„Hjá mörgum liðum er þetta byrjað að snúast um að reyna að finna einhvern lélegan varnarmann. Það væri þá helst Pablo [Bertone] en hann var stórkostlegur í kvöld. Það er erfitt að ‚targeta' einhvern hjá Stjörnunni og ætla að fara að níðast á honum eitthvað varnarlega. Ég var bara mjög hrifinn af þessu og þetta var bara töff,“ sagði Hlynur.

Hann hrósaði líka Pablo Bertone fyrir að sýna fagmennsku með því hvernig hann tók við mótlætinu þegar lítið gekk upp hjá honum.

„Honum til hróss þá var hann bara ‚prófessíonal' og fór ekki bara í fýlu eins og sumir í þessari deild,“ sagði Hlynur.

Þetta er geggjað lið

Sjö leikmenn í Stjörnunni sem skora yfir tíu stig í þessum leik.

„Allir þeir sem spiluðu leikinn voru frábærir í þessum leik. Ægir spilaði ekki síðustu tólf mínúturnar, held ég, af því að hann þurfti þess ekki. Seth LeDay er búinn að vera rosalegur eftir áramót. Þetta er geggjað lið,“ sagði Magnús Þór Gunnarsson.

Næst á dagskrá hjá Stjörnumönnum er undanúrslitaleikur á móti Keflavík í VÍS-bikarnum í kvöld þar sem er í boði sæti í bikaúrslitaleiknum á laugardaginn. Leikurinn fer fram í Smáranum og hefst klukkan 17.15.