„Ísak getur verið okkar fram­tíðar mark­vörður“

Ísland mætir Svíþjóð í tveimur vináttulandsleikjum 19. og 21. þessa mánaðar. Þetta eru fyrstu leikir íslenska liðsins síðan á Evrópumótinu þar sem það endaði í 4. sæti.

Þrír íslenskir leikmenn skoruðu tíu mörk eða meira í þýsku úrvalsdeildinni um helgina og Snorri segist sáttur með hvernig leikmenn íslenska liðsins koma undan Evrópumótinu.

„Það sem ég hef séð, og ég fylgist vel með þeim, þá er bara ánægður með það. Þeir virðast allir vera við hestaheilsu en auðvitað veit maður aðeins meira heldur en kannski aðrir og það eru hnökrar hér og þar. En núna er samt farið að nálgast þann tímapunkt að hlutirnir eru að gerast í öllum deildum í Evrópu. Þá eru yfirleitt góðir leikmenn bara klárir og eru á toppa á þessum tíma þannig að ef þeir standa sig þá kemur þér ekkert eitthvað svakalega á óvart,“ sagði Snorri.

Hefur nýtt tækifærin sín hjá Melsungen vel

Reynir er kominn á fulla ferð með Melsungen eftir að hafa glímt við veikindi fyrir áramót. Snorri kveðst sáttur með stöðuna á honum og segir hann vera framtíðarmann í landsliðinu. Reynir kemur inn í íslenska hópinn í staðinn fyrir Andra Má Rúnarsson sem var með á EM.

„Mér finnst hann auðvitað fyrst og fremst vera góður og  hafa spilað vel þegar hann hefur fengið tækifæri. Það er rétt að hann hefur þurft að glíma við töluvert mótlæti á sínu fyrsta tímabili í atvinnumennsku. Hann var með okkur síðasta vor og stóð sig frábærlega með Fram. Ég lít á hann sem einn af þessum leikmönnum sem eru framtíðarmenn og hann kemur svolítið inn í þetta hlutverk sem Andri Már var í á EM,“ sagði Snorri. 

„Ég er líka aðeins að hugsa lengra fram í tímann, og kannski líka með maí-gluggann í huga, að hann komist aðeins inn í hlutina og fái meiri tilfinningu fyrir því sem við erum að gera. Hann er partur af því að reyna aðeins að stækka hópinn í þessum glugga,“ sagði Snorri en Ísland mætir svo Egyptalandi ytra í tveimur vináttuleikjum í maí.

Langaði að sjá Ísak aftur

Ísak, sem ver mark Drammen í Noregi, kemur aftur inn í íslenska hópinn fyrir Einar Baldvin Baldvinsson sem var þriðji markvörður Íslands í aðdraganda EM.

„Mér finnst hann hafa staðið sig vel og spilað vel, sérstaklega eftir áramót. Hann hefur áður verið með okkur í þessu þriðja markmannshlutverki. Við prófuðum Ágúst Elí [Björgvinsson] um daginn og Einar Baldvin núna í janúar og fyrir mig er bara gott og fínt að fá tilfinningu fyrir þeim,“ sagði Snorri.

„Mig langaði bara að sjá Ísak aftur. Hann er ekki búinn að vera með okkur í síðustu tveimur gluggum og við teljum hann vera efnilegan og geti verið okkar framtíðar markvörður. Fyrst og fremst var þetta bara vegna hans frammistöðu eftir áramót sem mér fannst að hann ætti skilið að vera valinn.“

Ásamt Ísaki eru Viktor Gísli Hallgrímsson og Björgvin Páll Gústavsson markverðir í íslenska hópnum sem hefur æfingar á mánudaginn kemur.