Piparjónkan tekin af dag­skrá þremur dögum fyrir frum­sýningu

Paul er best þekkt fyrir hispurslausa framkomu sína sem aðalstjarna raunveruleikaþáttanna The Secret Lives of Mormon Wives auk þess sem hún hefur haslað sér völl sem áhrifavaldur í svokölluðum MomTok-kima samfélagsmiðilsins TikTok. 

Hún vakti mikla athygli árið 2022 þegar hún opnaði sig um að hafa stundað frjálsar ástir, þvert á strangar reglur mormónatrúarinnar en samkvæmt þeim er kynlíf utan hjónabands og neysla áfengis, tóbaks og koffíns meðal þess sem er bannað.

Bandaríski slúðurmiðillinn TMZ birti í dag myndband frá 2023 af Paul standa í stimpingum við þáverandi sambýlismann sinn, Dakota Mortensen. Í myndbandinu sést hún meðal annars kasta stólum í Mortensen að barnungri dóttur hennar viðstaddri. Paul var handtekin og ákærð fyrir alvarlega líkamsárás og heimilisofbeldi vegna málsins. 

Lögreglan í Draper City í Utah hefur staðfest við People að embættið standi að rannsókn á Paul og Mortenson, sem varðar heimilisofbeldi. 

Varað er við efni myndbandsins að neðan.

Frá því að myndbandið var birt hafa talsmenn Disney, sem á sjónvarpsstöðina ABC, staðfest að framleiðslu nýjustu þáttaraðar The Bachelorette, með Paul í aðalhlutverki, hafi verið hætt. Fyrirhugað var að sýna fyrsta þátt þáttaraðarinnar eftir þrjá daga. 

Viðskiptamiðillinn Forbes hefur eftir talsmönnum Paul að birting myndbandsins sé hluti af áralangri herferð sem snúist um að sverta mannorð hennar án tillits til dóttur Paul og fyrrverandi eiginmanns hennar. Myndbandið sé gamalt og algjörlega úr samhengi.