NFL-goðsögnin gaf Heimi góð ráð

Heimir kom Írum í umspilið með ævintýralegum sigrum gegn Portúgal og Ungverjalandi í nóvember. Nú þurfa þeir að vinna Tékka í Prag á morgun og svo heimaleik við Danmörku eða Norður-Makedóníu 31. mars, til að komast á HM í fyrsta sinn frá árinu 2002.

Eftirvæntingin er mikil á Írlandi og á meðal þeirra sem hafa verið fengnir til að tjá sig um umspilið er Bill Belichick sem unnið hefur átta Ofurskálarmeistaratitla á ferlinum.

„Þeir eru augljóslega með mjög gott lið fyrst þeir hafa náð svona langt og þá þurfa menn bara að treysta á það sem hefur skilað þeim í þessa stöðu,“ sagði Belichick á blaðamannafundi. Tilefni fundarins var tilkynning um að háskólalið North Carolina, sem þessi 74 ára gamla goðsögn þjálfar, yrði með í árlegum leik bandarískra háskólaliða í Dublin í ágúst.

Belichick hvatti Íra til að halda sig við það sem þeir hefðu verið að gera í undanförnum leikjum og treysta ferlinu. Aðspurður hvað Heimir gæti gert til þess að gera leikmenn sína klára svaraði hann:

„Það sem ég hef alltaf gert er að skapa aðstæður á æfingum sem eru erfiðari en í leikjum. Hlutir sem við glímum við í okkar íþrótt, eins og klukkan, hávaði í áhorfendum og fleira. Ég reyni alltaf að gera liðinu mínu eins erfitt fyrir og hægt er svo að þau ráði við þessar aðstæður þegar þær koma upp.

Ég trúi því að ef þú æfir þig í að gera erfiða hluti þá ráðir þú við þá þegar að því kemur. Ef þú undirbýrð þig ekki þá gætir þú frekar hugsað með þér: „Ég veit ekki hvort ég ræð við þetta.““